Leikjarýni: Grand Theft Auto V
Grand Theft Auto V er fimmti leikurinn í hinni umdeildu Grand Theft Auto (GTA) leikjaseríu frá Rockstar. Margir hafa beðið spenntir eftir leiknum sem er talið að hafi kostað allt að £170 milljónir í framleiðslu (sem gera tæpa 33 milljarða íslenskra króna) sem gerir GTA V að dýrasta tölvuleik sögunnar. Leikurinn hefur slegið eldri sölumet og skilaði inn einum milljarði Bandaríkjadala í kassann á aðeins þremur dögum.
Hér á landi héldu Gamestöðin og Elko sérstakar GTA V kvöldopnanir og setti leikurinn Íslandsmet í forsölu. En nóg um það, dembum okkur í leikinn!
Verið velkomin til Los Santos!
Leikurinn gerist í borginni Los Santos og nærliggjandi svæði þar sem spilarinn fer með hlutverk þriggja krimma; Michael, Franklin og Trevor, sem eru afskaplega ólíkir hver öðrum. Michael er miðaldra mafíósa týpan sem býr í fínu hús og er í miðri sálfræðimeðferð, Franklin er smákrimmi sem býr í gettóinu heima hjá frænku sinni og Trevor er stórklikkaður skapstór rauðhnakki sem býr rétt fyrir utan borgina og þú vilt ekki reita til reiði!
Los Santos er ansi stór borg sem býður upp á allskonar afþreyingu og þjónustu. Þar er hægt að skella sér í tennis, kvikmyndahús, strippbúllur, pöbba, bílaverkstæði, fatabúðir, tívolí og margt fleira. Verkefnin sem spilarinn þarf að leysa eru mjög fjölbreytt og geta verið allt frá því að stela bílum yfir í að ræna banka. Smáatriðin í leiknum eru stórkostlega vel gerð. Maður fær á tilfinninguna að engin tvö strá séu eins, svo vandað er umhverfi leiksins. Í leiknum er fjölbreytt flóra af fólki, farartækjum og hlutum og er til dæmis ákaflega sjaldgjæft að rekast á marga bíla af sömu gerð. Umbúðirnar í GTA V eru klárlega í lagi – en hvað með innihaldið?
Fjölbreytt umhverfi – Endalausir möguleikar
Það tók mig um 30 klukkutíma að klára söguþráð leiksins, auk þess sem ég kláraði nokkur aukaverkefni og ráfaði eitthvað um borgina til að prófa hina og þessa hluti. Svæðið í GTA V er mjög stórt, eða í kringum 127 km², sem er töluvert stærra en Kópavogur. Til samanburðar er Reykjavík 273 km², Kópavogur 113 km² og Hafnarfjörður 144 km² (Vísindavefurinn). Í fyrstu hljómar stærð svæðisins kannski yfirþyrmandi, en svæðið er passlegt fyrir 30 klukkutíma spilun. Rockstar fókusar aðeins of mikið á raunveruleikann og stundum óskaði maður þess að sköpunargleðin hefði fengið meira pláss í leiknum þar sem borgina skortir eftirminnilegar byggingar eða óhefðbundin landsvæði.
Spilarinn getur með auðveldum hætti skipt á milli þess að spila sem Michael, Franklin eða Trevor og fær auk þess að taka ákvarðanir um hvernig ákveðin verkefni eru skipulögð. Þessir 30 klukkutímar voru mjög fljótir að líða og enn nóg að gera í borginni. Það verður spennandi að sjá hvaða aukapakkar verða gefnir út í framtíðinni og fylgjast betur með fjölspilunarhluta leiksins – GTA Online.
En af hverju ekki 5 stjörnur?
Þó væntingunum hafi verið stillt í hóf þótti mér vanta ákveðna dýpt í leikinn. Spilarinn flakkar á milli þess að spila sem Michael, Franklin og Trevor án þess að ná góðum tengslum við persónurnar og þar af leiðandi var upplifunin á söguþræði leiksins ekkert sérstök. Það er kannski erfitt að mynda einhver tengsl við samviskulausa glæpamenn sem skjóta á allt sem hreyfist, en mér þykir t.d. L.A. Noire, Sleeping Dogs og Red Dead Redeption hafa náð að mynda áhrifaríkari og sterkari tengsl milli spilarans og aðalpersóna með vandaðri söguþræði og betri persónusköpun. Söguþráður leiksins virkar eins og góð kynning á þá möguleika sem leikurinn hefur upp á að bjóða, en er langt frá því að fanga mann.
Miðað við hasarleiki nútímans má segja að GTA V sé nokkuð rólegur á köflum, sérstaklega þegar leikurinn krefst þess að spilarinn keyri langar leiðir fram og til baka, sem er einfaldlega einhæft og leiðinlegt til lengdar. En leikurinn býður upp á það marga möguleika að upplifun hvers og eins er einstök með mismunandi áherslu. Með þessari gagnrýni er ég að skoða litlar rispur á annars mjög svo fallegum demanti. GTA V býður upp tugi klukkutíma af skemmtilegri spilun og ótrúlega fallegan heim sem vert er að skoða.
GTA Online
Leikurinn býður einnig upp á fjölspilun þar sem allt að 16 spilarar geta keppt samtímis. Ekki verður opnað fyrir fjölspilun leiksins fyrr en í október og verður því sérstök gagnrýni tengd fjölspiluninni birt síðar. [Smelltu hér til að lesa leikarýni GTA V Online]
Öll þessi geðveiki – í hnotskurn
Grand Theft Auto V er stórgóður leikur. Sagan nær ekki að fanga mann en GTA V býður þó upp á heilan heim af góðgæti og frábærri skemmtun. Los Santos borg og nærliggjandi umhverfi er stórkostlega fallegt og einstaklega vel gert. Fjölbreyttni og raunveruleiki leiksins er til fyrirmyndar og endingartími leiksins er mjög góður (og á eflaust eftir að vera enn betri þegar GTA Online fer í gang). Spilun leiksins er jafn fjölbreytt og verkefnin þar sem spilarinn þarf meðal annars að ræna verslun, stinga lögguna af og fljúga flugvél. Los Santos býður einnig upp á fína afþreyingu þar sem hægt er að spila tennis, skella sér á rúntinn, hlusta á góða tónlist – eða einfaldlega hanga heima og horfa á sjónvarpið. GTA V er leikur sem enginn leikjaunnandi ætti að láta framhjá sér fara. Sjáumst í Los Santos!
Höfundur er Bjarki Þór Jónsson,
ritstjóri Nörd Norðursins.
Þú hefur kannski áhuga á þessu...
Final Fantasy VII Rebirth – „Ævintýrið heldur áfram“ →
Leikjavarpið #32 – Guardians of the Galaxy, State of Play og Nintendo Expansion Pack →
Leikjavarpið #30 – Far Cry 6, FIFA 22 og Battlefield 2042 Beta →
