Topp 5: Íslenskar vefsíður fyrir kvikmyndanörda
Nörd Norðursins er líklega eina íslenska síðan sem fókusar á nördismann almennt, en á netinu leynast nokkrar aðrar íslenskar síður sem lesendum okkar gætu þótt áhugaverðar. Við höfum þess vegna ákveðið að birta nokkra topplista á komandi vikum yfir íslenskar vefsíður sem okkur þykir vert að benda á.
Við byrjum á lista yfir síður sem fókusa á íslenska kvikmyndanörda. Þó flestar síðurnar fjalli um kvikmyndir á mun almennari hátt en við nördarnir að þá má oft finna töluvert efni sem hittir í mark. Tekið skal fram að listinn er birtur í stafrófsröð þar sem allar síðurnar bjóða upp á fjölbreytt og áhugavert efni.
Allar síðurnar eru á íslensku.
Bíóvefurinn
Bíóvefurinn fór í loftið snemma á þessu ári og birtir fréttir úr heimi kvikmyndanna auk þess að gagnrýna nýjar og gamlar kvikmyndir, birta topplista og fleira. Á síðunni er líka að finna lista yfir þær kvikmyndir sem eru til sýnis í kvikmyndahúsum hverju sinni. Á bakvið vefinn stendur fjölbreyttur hópur sem hefur mikinn áhuga á kvikmyndum. Þar á meðal eru Axel Birgir Gústavsson sem var um tíma einn af okkar föstu pennum og Tómas Valgeirsson ritstjóri vefsins. Já, og talandi um Tómas…
> Slóð: www.biovefurinn.is
Gagnrýni Tómasar Valgeirssonar
Síðan er látlaus og einföld bíóbloggsíða þar sem Tómas Valgeirsson, ritstjóri Bíóvefsins, birtir gagnrýnir og hugleiðingar sínar. Síðan er misjafnlega oft uppfærð en klárlega þess virði að kíkja á, sama hvort þú sért sammála eða ósammála Tómasi.
> Slóð: www.biofikill.com
Kvikmyndir.is
Trúlega stærsta, virkasta og öflugasta kvikmyndasíða Íslands. Á síðunni er að finna stiklur, sýningartíma kvikmyndahúsa, rafræna útgáfu af Myndum mánaðarins, öflugan gagnagrunn kvikmynda, gagnrýni og margt margt fleira. Síðan var opnuð 1998 og í dag þekkja flestir íslenskir kvikmyndaunnendur til síðunnar. Í dag ritstýrir Þóroddur Bjarnason, listamaður með meiru, síðunni sem er í eigu Út úr kú ehf.
> Slóð: www.kvikmyndir.is
RÚV
Á heimasíðu RÚV er að finna góða og hnitmiðaða kvikmyndagagnrýni. Það leynast gullmolar inn á heimasíðu RÚV fyrir kvikmyndanörda en það bráðvantar sérstakt kvikmyndahorn sem birtir allt efni RÚV sem tengist kvikmyndum. Þar kemur Google að góðum notum og er hægt að nota leitarorðið “kvikmyndir site:ruv.is” [http://lmgtfy.com/?q=kvikmyndir+site%3Aruv.is] til að finna fjölbreytta konfektmola. Á heimasíðu RÚV er bæði hægt að nálgast kvikmyndagagnrýnina sem og örstutta texta eða með því að hlusta á útvarpsupptökurnar (sem er svo miklu skemmtilegra!).
> Slóð: www.ruv.is/kvikmyndagagnryni
Svarthöfði
Stílhrein og virk heimasíða um allt milli himins og jarðar sem tengist kvikmyndum. Síðan fór í loftið árið 2011 og hefur stækkað hratt og örugglega síðan þá. Þó að síðan beri sama nafn og eitt mesta (og flottasta) illmenni kvikmyndasögunnar er síðan svo sannarlega af hinu góða. Vignir Jón Vignisson fréttafulltrúi og Þórarinn Þórarinsson blaðamaður ritstýra vefnum.
> Slóð: www.svarthofdi.is
Það er ómögulegt að sleppa þræðinum hér án þess að benda á nokkrar síður til viðbótar.
Erlingur Grétar Einarsson sér um kvikmyndasíðuna Filmophilia sem er mjög öflug og hefur stækkað hvað hraðast af öllum þeim síðum sem hér hafa verið nefndar. Eina ástæðan fyrir því að síðan endaði ekki á topp 5 listanum er að hún er á ensku en ekki íslensku. Filmophilia fær einnig stóran plús fyrir að vera mjög virk í að birta viðtöl við fólk úr kvikmyndaheiminum og fyrir að vera með sérstaka möppu sem er tileinkuð íslensku efni (Icelandic stuff).
Hér vil ég nefna þrjá handhægar síður sem er gott að vita af en eru þó sjaldan heimsóttar. Kvikmyndavefurinn er íslenska útgáfan af IMDb þar sem hægt er að finna upplýsingar um íslenskar kvikmyndir, leikara , leikstjóra og annað fólk sem tengist íslenska kvikmyndaiðnaðinum. Á heimasíðu kvikmyndaskoðunar er hægt að nálgast lista yfir aldurs- og innihaldsmerkingar kvikmynda (sérlega þægilegt fyrir foreldra sem vilja fylgjast með því hvað börn þeirra eru að horfa á). Síðan en ekki síst ber að nefna að verið er að uppfæra heimasíðu Kvikmyndasafns Íslands og verður spennandi að sjá útkomuna á þeirri vinnu.
Í lokin minni ég lesendur á kvikmyndahorn Nörd Norðursins þar sem hægt er að finna fróðleik, fréttir, gagnrýni, topplista og fleira með nördalegu (og íslensku) yfirbragði.
Finnst þér vanta einhverja síðu á listann?
Höfundur er Bjarki Þór Jónsson,
ritstjóri Nörd Norðursins.
Þú hefur kannski áhuga á þessu...
10 vel heppnaðir hinsegin tölvuleikir →
Sjö ómissandi Switch leikir →
Þrír vinsælustu þættir Leikjavarpsins árið 2021 →
