Kaldi gengur til liðs við Team Infused

Starcraft 2 spilarinn Jökull Jóhannsson, betur þekktur undir spilaranafninu Kaldi, skrifaði nýverið undir samning við breska liðið Team Infused. Team Infused er breskt atvinnulið og er þegar með nokkra góða Starcraft 2 spilara innanborðs, en einnig halda þeir úti liðum í öðrum leikjum eins og League of Legends, Counter-Strike: Global Offensive og Dota 2. Kaldi mun spila Starcraft 2 fyrir hönd Team Infused á Multiplay mótinu í Bretlandi í lok mars, og einnig á Dreamhack mótinu í Svíþjóð í júní. Kaldi hefur þegar getið sér gott orð í Starcraft 2 heiminum, en hann spilar í evrópsku Grandmaster deildinni og sigraði einnig Starcraft 2 mót HR-ingsins í fyrra. Nokkur erlend lið hafa þegar reynt að fá hann til liðs við sig, en hvað varð til þess að hann skrifaði undir hjá Team Infused. Nörd Norðursins hafði samband og fékk Kalda til að svara nokkrum stuttum spurningum.

Hvernig orsakaðist það að þú gekkst til lið við Team Infused?
„Ég hafði bara heyrt góða hluti um Infused og vissi að þeir væru vel sponsoraðir. Ég hafði spilað við nokkra af spilurum þeirra á ladder. Mér var síðan bent á það frá félaga mínum að þeir væru að leita að Grandmaster spilurum þannig ég hafði samband.“

Höfðu þeir heyrt af þér áður?
„Þeir höfðu heyrt aðeins af mér en í rauninni bara það að ég var Grandmaster.“

Hvað felst í því að vera liðsmaður Team Infused?
„Ég má því miður ekki tala um samninginn sjálfann en Infused styrkir spilara sína fjárhagslega. Infused verður með svæði á Multiplay mótinu og við verðum þrír úr Starcraft liðinu þar, og síðan Counter-Strike Global Offensive og League of Legends liðin þeirra. Það er aðeins lengra í Dreamhack þannig það er ekki búið að taka ákvarðanir um það, en mér skilst að LoL liðið muni fara á Dreamhack líka.“

Hvar sérðu þig og Starcraft 2 samfélagið eftir 1-3 ár?
„Starcraft atvinnuspilun er frábrugðin flestum öðrum keppnisleikjum, ekki er um að ræða eitt til tvö tímabil á ári heldur 4-5, og meðalferill Starcraftspilara er aðeins 4-5 ár en ekki 10-12, þannig ég á mjög erfitt með að segja til um hvað verður í gangi eftir ár. Markmið mín á næstunni eru þau að ná Grandmaster titli þegar Heart of the Swarm kemur út og að komast áfram í úrslitakeppnina á Multiplay mótinu í Bretlandi.“

Heldur þú að staða Starcraft 2 eigi eftir að styrkjast á næstu misserum, þá sérstaklega með tilliti til útkomu nýju Heart of the Swarm viðbótarinnar?
„Ég er frekar bjartsýnn hvað varðar Starcraft samfélagið og ég held að það muni styrkjast við komu Heart of the Swarm. Líklega verður engin sprenging eins og varð þegar Wings of Liberty kom út en með nýju breytingunum ætti samfélagið að stækka.“

Nörd Norðursins mun koma til með að fylgjast með framgöngu Kalda á komandi stórmótum og óskar honum, og Team Infused, til hamingju með samstarfið.