Það eru liðin um sjö ár síðan The Crew 2 rúllaði út frá Ubisoft og bauð leikmönnum að þeytast um Bandaríkin á fullri ferð. Við fjölluðum um leikinn hér á síðunni þegar hann kom út og svo aftur þegar framhaldið, The Crew: Motorfest, birtist fyrir um tveimur árum síðan.
Nú er The Crew 2 kominn aftur í sviðsljósið – og það með ansi góðar fréttir. Ubisoft hefur loksins sent frá sér uppfærslu sem gerir leikinn spilanlegan án nettengingar, eitthvað sem hefur verið mikið óskað eftir síðan hann kom út.
Þegar fyrsti The Crew leikurinn kom út árið 2014 þurfti hann stöðugt nettengingu, jafnvel þótt þú vildir bara keyra einn um vegina. Það varð að vandamáli þegar Ubisoft slökkti á netþjónum leiksins árið 2024 – leikurinn varð einfaldlega ónothæfur. Það fór ekki vel í fólk sem hafði greitt fyrir leikinn og vildi bara fá að keyra bílinn sinn í friði.
Þessi atburður varð til þess að umræðan um „ávallt nettengda“ leiki kviknaði á ný, enda hefur þessi stefna oft fengið á sig skammir fyrir að gera leiki háða netþjónum sem geta hætt að virka hvenær sem er.
Eftir gagnrýnina lofaði Ubisoft að gera betur – og það virðist loksins hafa gerst. Með nýju uppfærslunni geta leikmenn nú spilað The Crew 2 offline og notið leiksins löngu eftir að netþjónum verður lokað.
Uppfærslan breytir leiknum í svokallað „blendingsmódel“, þar sem netvirknin er fjarlægð. Þú munt því ekki lengur sjá stigatöflur, tölfræði annarra eða geta tekið þátt í netkeppnum – en öll aukahlutin sem þú hefur keypt haldast, svo lengi sem þau voru virkjuð áður.
Það er þó eitt sem þarf að hafa í huga: vistun (save) fyrir net- og netlausu útgáfuna eru aðskildar. Þú getur flutt árangurinn þinn úr netleiknum yfir í offline-útgáfuna, en ekki öfugt. Crew Credits fylgja með, en sumt efni verður áfram aðeins fáanlegt í netútgáfunni.
Ubisoft hefur staðfest að svipuð „offline“ uppfærsla sé í vinnslu fyrir The Crew: Motorfest, en engin dagsetning hefur verið gefin út. Miðað við að það tók um ár fyrir The Crew 2 að fá þessa breytingu, er líklegt að Motorfest fái sína útgáfu einhvern tíma á næsta ári.
Allt í allt er þetta mjög jákvætt skref frá Ubisoft – og góðar fréttir fyrir alla sem vilja eiga sína leiki áfram, jafnvel þegar netþjónarnir hafa verið lagðir í helgan stein.
Heimild: Rock Paper Shotgun