5 frekar frábær fantasíuborðspil
Drekar, dýflissur, galdrar og illir andstæðingar sem eiga alltof mikið af svörtum fötum – klassískir fantasíuheimar hafa alltaf verið mikilvægur hluti af nördakúltúrnum, og borðspilin eru þar engin undantekning. Hér eru fimm frábær borðspil fyrir þá sem vilja draga galdrasverð sitt úr slíðri og leggja í hættuþrungna fantasíuför …
Lord of the Rings
Það væri ótækt að gera nokkurn fantasíulista án þess að Hringsdróttinssaga Tolkiens kæmi að minnsta kosti einu sinni fyrir. Það þarf væntanlega ekki að kynna efni þessarar frumstoðar fantasíuheimsins fyrir lesendum Nörd Norðursins, og að sjálfsögðu eru til ótal borð- og kortaspil byggð á henni. Þeirra vinsælast er líklega Lord of The Rings, samvinnuspil frá Hasbro sem út kom árið 2000. Spilarar taka að sér hlutverk hobbita og ferðast með hringinn eina gegnum ýmis sögusvið sögunnar til Mordor til að eyða honum þar, áður en Sauron nær of miklum yfirráðum til að hobbitarnir hafi svigrúm til að ná takmarki sínu. Gott merki um vinsældir spilsins er að það var á sínum tíma m.a.s. þýtt á íslensku af Fjölvaútgáfunni, og heitir á íslensku Hringadróttinsspilið.
Lords of Waterdeep
Talandi um dreka og dýflissur, þá á heimsveldi hlutverkaspilsins Dungeons and Dragons að sjálfsögðu fast sæti á hvaða fantasíulista sem er. Lords of Waterdeep er verkstjórnunarspil frá Wizards of the Coast sem hefur notið mikillra vinsælda síðan það kom út 2012 (Magnús fjallaði nýlega um spilið hér á Nörd Norðursins). Fyrir þá sem þekkja til Dungeons and Dragons heimsins á spilið sér stað í borginni Waterdeep í Forgotten Realms heimi D&D – spilarar nota auðlindir sínar og herkænsku til að ljúka verkefnum í Waterdeep og nágrenni hennar og verða ríkasti og valdamesti aðalsmaður borgarinnar. Spilið tekur ansi mikið borðpláss, en plásslitlir spilarar geta einnig fengið sér Lords of Waterdeep sem app á iOS.
Small World
Strategíuspilið Small World frá Days of Wonder, gefið út 2009, er ekki byggt á einhverjum einum fantasíuheimi, en notast við allar mögulegar og ómögulegar tegundir fantasíupersóna sem spilarar munu þekkja úr ýmsum sögum. Hver spilari velur sér einn hóp persóna (t.d. dverga eða álfa eða drýsla) og eitt einkenni (t.d. Heroic eða Wealthy) úr fjölbreyttri flórunni sem í boði er og notar síðan þann hóp, með þeim hæfileikum sem hann hefur, til að reyna að ná yfirráðum yfir eins miklu landsvæði og hann getur. Small World hefur verið mjög vinsælt frá því það kom út – það eru til ýmsar viðbætur við það og aftur geta þeir sem eru plásslausir notað app til að spila það.
Game of Thrones
Fáar fantasíur eru vinsælli þessa dagana en Game of Thrones sería G. R. R. Martin, og eftir því eru til allskonar korta- og borðspil byggð á henni. Herkænskuspilið frá Fantasy Flight Games, gefið út 2003, þykir einna best heppnað af þeim Game of Thrones spilum sem til eru – og óneitanlega smellpassar sú spilategund (stríð og valdatafl og landamæradeilur) við söguna sjálfa, í raun mætti segja að Game of Thrones væri herkænskusaga. Spilarar velja sér eitt af húsunum úr sögunni og reyna síðan að ná valdi yfir sem mestu landi og brjóta hin húsin á bak aftur með orrustum, bandalögum og svikum. Það eru til nokkrar viðbætur sem bæta m.a. við tilvísunum í bækur sem hafa komið út síðan spilið kom fyrst út.
Munchkin
Það er alltsaman gott og blessað að hafa háfleygar hugsjónir um að bjarga (fantasíu)heiminum frá illum öflum, en við höfum öll hitt spilara sem hafa minni áhuga á söguþræðinum og meiri áhuga á að drepa fleiri skrímsli, safna fleiri stigum og fá meira gull en allir hinir spilararnir. Munchkin er spil í léttari kantinum frá Steve Jackson, fyrst gefið út 2001, sem leggur alla áhersluna á lootið og gamansömu tilvísanirnar í önnur alvarlegri fantasíuspil. Munchkin er samt þrusugott spil í sjálfu sér, og hugmyndin virkar greinilega vel því það eru til ótal Munchkin viðbætur og útgáfur.
Þú hefur kannski áhuga á þessu...
Spilaðu sem landnámsmaður á Íslandi í tölvuleiknum Landnáma →
Game of Thrones viskíflöskurnar fást í fríhöfninni →
Nörd í Reykjavík – Efnisyfirlit yfir alla fimm þættina →
