Undanfarin ár hafa listasöfn sýnt tölvuleikjum aukinn áhuga og hélt Smithsonian-safnið í Bandaríkjunum meðal annars sérstaka tölvuleikjalistasýningu í fyrra.
Laugardaginn 2. mars síðastliðinn var sýningin Applied Design opnuð í nýlistasafninu MoMA í New York. Fjöldi fjölbreyttra verka eru til sýnis á þessari sýningu, þar á meðal 14 tölvuleikir sem þykja framúrskarandi í gagnvirkri hönnun. Íslenski leikurinn EVE Online frá CCP er á meðal þeirra sem eru til sýnis og er hann heldur betur í góðum félagsskap eins og sjá má á þessum lista yfir leiki sem eru til sýnis á sýningunni, en þetta eru fyrstu leikirnir sem eru til sýnis í MoMA:
- Pac-Man (Namco, 1980)
- Tetris (Alexey Pajitnov, 1984)
- Another World (Eric Chahi, 1991)
- Myst (Cyan, 1993)
- SimCity 2000 (Maxis, 1994)
- Vib-Ribbon (NanaOn-Sha, 1999)
- The Sims (Maxis, 2000)
- Eve Online (CCP Games, 2003)
- Katamari Damacy (Namco, 2004)
- Dwarf Fortress (Tarn and Zach Adams, 2006)
- Flow (thatgamecompany, 2006)
- Portal (Valve Software, 2007)
- Passage (Jason Rohrer, 2008)
- Canabalt (Adam Saltsman, 2009)
RÚV var með skemmtilega umfjöllun og myndir frá sýningunni í menningarþættinum Djöflaeyjan sem var sýndur í sjónvarpinu í vikunni. Þar náðu þau meðal annars tali við Torfa Frans Ólafsson, listrænan stjórnanda hjá CCP, sem segir að leikurinn hafi fyrst og fremst verið valinn á sýninguna þar sem hann er hermir á vísindaskáldsögu-samfélagi með yfir 400.000 spilara. Til gamans má geta tóku EVE Online spilarar stóran þátt í að móta sýninguna þar sem þeir tóku upp mikið af því efni sem er notað. Við mælum með því að horfa á umfjöllunina í heild sinni hér, en umfjöllunin byrjar þegar 28 mínútur og 45 sekúndur eru liðnar af þættinum.
Sýningin stendur til 31. janúar 2014.
Mynd frá sýningunni. Eve Online er á miðri myndinni með stjörnukort í bakrunni. // Birt með leyfi MoMA.
Heimildir: CCP, MoMA, RÚV, Polygon og Djöflaeyjan.
Forsíðumynd: EVE Online.
Höfundur er Bjarki Þór Jónsson,
ritstjóri Nörd Norðursins.
-
Tengt efni: Ico, Flower, og tölvuleikir sem listform.