Það helsta sem þú þarft að vita fyrir Midgard 2019!
Dagana 13.-15. september næstkomandi verður Midgard ráðstefnan haldin í annað sinn. Við nördarnir mættum í fyrra og mælum hiklaust með þessum viðburði. Hér er yfirlit yfir allt það helsta sem þú þarft að vita fyrir Midgard 2019!
Hvað er Midgard?
Midgard er nördaráðstefna (eða „convention“ (stundum stytt sem con) eins og þekkist erlendis) á vegum Nexus og Cosplay Iceland. Margar ráðstefnur leggja áherslu á ákveðin þemu innan nördaheimsins eins og til dæmis getur verið sérstök ráðstefna eingöngu tileinkuð teiknimyndasögum og önnur tölvuleikjum, en á Midgard er eitthvað fyrir alla, sama hvort þú hefur áhuga á borðspilum, tölvuleikjum, teiknimyndasögum, búningum, ofurhetjum eða öðru sem tengist hinum undurfagra nördaheimi.
Hverjir mæta og hvað verður í boði?
Sérstakir gestir í ár eru meðal annars Hugleikur Dagsson ofurnörd, Manu Bennett úr Spartacus sjónvarpsþáttunum, Tom Vasel og Zee Garcia úr The Dice Tower, Dan Abnett, Guardians of the Galaxies teiknimyndasöguhöfundur og höfundur Warhammer 40k skáldsagna, Ivan King, tónlistarmaður, leikari og cosplay hönnuður og David Bateson sem ljáir meðal annars Agent 47 rödd sína í Hitman tölvuleikjunum. Hægt er að sjá lista yfir alla gesti Midgard 2019 á heimasíðu hátíðarinnar.
Fjölmörg fyrirtæki og einstaklingar verða á staðnum að kynna eða selja varning. Þar á meðal verða íslensku tölvuleikjafyrirtækin Myrkur Games, Solid Clouds og Parity á staðnum með leiki sem eru í vinnslu. Vinir okkar úr Spilavinum og Gamestöðinni verða með sérmerkt svæði auk fjölmargra listamanna.
Á heimasíðu Midgard er að finna lista yfir alla sýningar- og sölubása, gesti og dagskrá, en líkt og í fyrra endar hátíðin með cosplay-keppni sem fer fram á sunnudagskvöld.
Hvar og hvenær verður ráðstefnan haldin?
Í fyrra var Midgard ráðstefnan haldin í Laugardalshöll en að þessu sinni fer hún fram í knattspyrnuhöllunni Fífan í Dalsmára 5 í Kópavogi dagana 13, 14. og 15. september, en mest er um að vera laugardaginn 14. september og sunnudaginn 15. september.
Hvað kostar og hvar kaupi ég miða?
Miðakaup fara fram á Tix.is. Hægt er að kaupa hefðbundinn þriggja daga passa á 10.000 kr. sem gildir út hátíðina eða sérstakan VIP passa á 25.000 kr. sem gefur aukin fríðindi eins og að mæta á undan öðrum og hitta gesti hátíðarinnar. Einnig er hægt að kaupa staka dagspassa á 4.000-5.500 kr. og fá börn á aldrinum 8-14 ára passa á um helmingi lægra verði og börn undir 8 ára aldri fá frítt inn svo framarlega sem þau eru í fylgd með fullorðnum með passa.
Nánari upplýsingar?
Nánari upplýsingar er að finna á heimasíðu Midgard og á Facebook-síðu Midgard.
Þú hefur kannski áhuga á þessu...
Returnal, NUTS og fleiri leikir verðlaunaðir á Nordic Game Awards →
Leikjavarpið #27 – Gamescom 2021, Baldo og Arena heimsókn →
Mandalorian spottaður við eldgosið í Fagradalsfjalli! →
