Vikings of Thule
Laugardaginn 31. desember mun íslenska leikjafyrirtækið Gogogic loka fyrir samfélagsleikinn Vikings of Thule. Að því tilefni höfum við ákveðið að kveðja leikinn með því að spila hann í síðasta sinn og fjalla um hann samhliða því.
Vikings of Thule er MMORPG (Massively Multiplayer Online Role Playing Game) fjölspilunarleikur sem hefur verið hægt að spila ókeypis á Facebook og hi5. Í leiknum stjórnar spilarinn víkingi sem er á höttunum eftir völdum, en markmið leiksins er að verða ein/n af þeim 39 sem stjórna landinu og eru með atkvæðisrétt á Alþingi. Á leið sinni til valda þarf spilarinn að berjast við ýmsa andstæðinga, eiga viðskipti við aðra spilara, öðlast virðingu og uppfæra vopn, skjöld og aðra hluti.
Landakortið í leiknum er gamaldags kort af Íslandi þar sem spilarinn getur meðal annars heimsótt Reykjavík, Ísafjörð, Akureyri og Egilsstaði til að uppfæra víkinginn sinn og versla. Auk þess er hægt að nálgast stutta og skemmtilega fróðleiksmola um staðina fjóra. Spilarinn á sitt eigið hús, jörð og vinnumenn sem afla inn hlutum sem er svo hægt að nota fyrir ýmislegt. Hlutina má m.a. nota til að kaupa hluti fyrir víkinginn, uppfæra húsið sitt eða berjast við andstæðinga, en spilarinn þarf oft að leggja hluti undir til að geta barist við andstæðinga sína.
Í myndbandinu hér fyrir neðan sjáum við kortið í leiknum, staðina fjóra, heimili spilarans, víkinginn (spilarann) og hluta af ævintýraför víkingsins þar sem hann slátrar nokkrum óvinum.
Í Battle Arena geta spilarar barist á móti hvor öðrum. Mér tókst ekki að finna annan spilara til að berjast við þegar ég tók upp myndbandið þannig að þið fáið í staðinn að fylgjast með nokkrum æfingaleikjum sem virka mjög svipað. Andstæðingarnir byrja á móti hvor öðrum í borði sem er skipt í 5×5 reiti. Í hverri lotu velja báðir spilararnir þrjár aðgerðir til að framkvæma, spilarinn getur t.d. valið á milli þess að færa víkinginn milli reita, láta hann verja sig, sveifla sverði sínu, nota galdra eða safna orku. Að því loknu eru aðrar þrjá aðgerðir valdar og svo koll af kolli þar til annar víkingurinn er dauður. Í myndbandinu sjáum við hvernig þessar reglur virka í leiknum, en það verður að segjast eins og er að bardagakerfið er ansi skemmtilegt og vel heppnað.
Heilmikið er sótt úr norrænni goðafræði, t.d. koma Óðinn, Þór, Baldur, Heimdallur, Loki og Freyja við sögu og tilvitnanir úr Hávamálum eru birtar. Grafíkin í leiknum er flott miðað við marga aðra samfélagsmiðlaleiki og er hægt er að finna helling af skemmtilegum smáatriðum. Tónlistin í Vikings of Thule er mjög grípandi og passar vel við anda leiksins, ber þar sérstaklega að nefna bardagatónlistina og lagið sem notað er í kitlunni fyrir leikinn sem Egill og Jónas Antonssynir sömdu. Við endum þessa umfjöllun á umræddri kitlu.
Smelltu hér ef þú vilt spila leikinn (lokar 31.12.2011).
– BÞJ
Þú hefur kannski áhuga á þessu...
Leikjavarpið #35 – Viðtal við Ara Þór hjá Epic Games →
Leikjavarpið #26 – Ratchet & Clank, Steam Deck og Activision Blizzard kæran →
Ring Fit áskorun í febrúar! →
