Fyrr í vikunni kom leikurinn Master Lemon: The Quest for Iceland út á PC (Steam), PlayStation 5, Xbox Series S|X og Nintendo Switch. Leikurinn er þróaður og hannaður af brasilíska leikjafyrirtækinu Pepita Digital og gerður til að heiðra minningu André Lima sem lést í bílslysi stuttu eftir að hafa flutt til Íslands. Við ræddum við Julio Santi sem er leikjahönnuður leiksins og jafnframt góður vinur Andrés.
„Ég kynntist André þegar ég var 19 ára og komst fljótt að því að hann hafði mikinn áhuga á tungumálum“ segir Julio. „André dreymdi um að læra íslensku og dáði íslenska menningu. Hann var búinn að læra fjölda tungumála en það var eins og hans æðsta markmið hafi verið að læra íslensku. Alveg síðan að hann var barn vildi hann læra íslensku sökum þess hve einstakt málið er.“
Árið 2015 fékk André vinnu á Íslandi og flutti til Íslands með það markmið að læra tungumálið og kynnast Íslandi betur. Ári síðar fer hann í ferðalag um Austur-Evrópu og lenti þar í bílslysi sem kostaði hann lífið, þá aðeins 27 ára gamall. Julio Santi segir að missirinn hafi verið erfiður og að hann vildi heiðra minningu hans í gegnum tölvuleik. Julio hafði aldrei búið til tölvuleik áður en er með reynslu úr kvikmyndaheiminum þar sem hann var þá búinn að gefa út tvær kvikmyndir í fullri lengd. „Ég elska að segja sögur og vildi gera tölvuleik. André kenndi mér að fylgja draumum sínum og gefast aldrei upp.“
„Ég elska að segja sögur og vildi gera tölvuleik. André kenndi mér að fylgja draumum sínum og gefast aldrei upp.“
Master Lemon: The Quest for Iceland flokkast sem sögudrifinn ævintýraleikur. Leikurinn spilast sem pikk-öpp-leikur þar sem Lemon, aðalsöguhetja leiksins, þarf að finna hluti og tala við persónur sem á vegi hans verða. Sérkenni leiksins er notkun hans á ólíkum tungumálum. Á leið sinni um ævintýraheima lærir Lemon fjölda nýrra orða frá ýmsum löndum, þar á meðal íslensk orð sem gefa honum nýja krafta eða vísbendingar sem ýta sögunni áfram. Meðal þess sem Lemon lærir er orðið „styrkur“, „víðsýni“ og „þetta reddast.“