Valve kynnti fyrir stundu til sögunnar nýtt stýrikerfi – SteamOS. Um er að ræða stýrikerfi sem er hannað fyrir sjónvörp og sem afþreyingarmiðja í hjarta heimilisins. Með SteamOS verður hægt að spila tölvuleiki af Steam í sjónvarpinu og eru leikjahönnuðir nú þegar farnir að þróa leiki með SteamOS í huga.
Með SteamOS verður hægt að spila Windows og Mac leiki í sjónvarpinu, einnig verður hægt að streyma tónlist, sjónvarpsefni og kvikmyndum beint yfir í sjónvarpið. Með SteamOS fá notendur fullan aðgang að leikjasafni Steam sem inniheldur í kringum 3000 leiki og forrit.
Yfir 50 milljón notendur eru skráðir á Steam sem fókusar fyrst og fremst á tölvuleiki og veitir notendum góðan grunn til að stofna leikjahópa og vera í sambandi við leikjavini. Með tímanum munu viðbætur vera fáanlegar fyrir SteamOS sem notendur geta sótt og tekið þátt í að búa til.
SteamOS er næsta stóra skrefið hjá Steam, sem nú er aðgengilegt í 185 löndum og hefur verið þýtt á 25 tungumál. SteamOS byggir á Linux grunni og verður fáanlegt árið 2014, ókeypis.