Sjónaukinn – Ný vefþáttaröð um stjörnufræði og stjörnuskoðun

Stjörnufræðivefurinn hefur birt fyrsta þáttinn af Sjónaukanum, nýrri vefþáttaröð um stjörnufræði og stjörnuskoðun. Í þessari vefþáttaröð verður m.a. fjallað um stjörnuhimininn yfir Íslandi, fróðleik um sólkerfið okkar, stjörnur, svarthol, Miklahvell og margt fleira. Áhugasamir geta fylgst með þáttunum á Stjörnufræðivefnum eða beint af Vimeo síðu vefsins, þar sem innihaldi fyrsta þáttarins er lýst á eftirfarandi hátt:

Í fyrsta þættinum er fjallað um það sem sjá má á stjörnuhimninum yfir Íslandi í október. Snemma í mánuðinum verður falleg samstaða Venusar, tunglsins og stjörnunnar Regúlusar í Ljóninu sem vert er að veita athygli. Einnig er sagt frá Sumarþríhyrningum, samstirni þriggja stjarna í Svaninum, Hörpunni og Erninum sem er áberandi á hausthimninum yfir Íslandi.