E3 2018: Sýnishorn úr Battlefield V og Anthem

Á E3 kynningu EA Games í ár voru meðal annars birt ný sýnishorn úr stórleikjunum Battlefield V og Anthem. Þær nýjungar sem kynntar voru til sögunnar fyrir fyrstu persónu skotleikinn Battlefield V voru þær að nú geta spilarar hoppað í gegnum glugga og fært stærri vopn til á milli staða, auk þess verður hægt að eyðileggja nánast hvað sem er í umhverfi leiksins. Spilarar fá einnig svigrúm til að breyta (costumize) persónum sínum og farartækjum. Einnig verður að finna Battle Royale fjölspilunarhluta í leiknum þar sem leikmenn berjast til síðasta blóðdropa líkt og þekkist í leikjum á borð við Fortnite. Battlefield V er væntanlegur í verslanir 19. október á þessu ári.

Við fengum að sjá nýtt sýnishorn úr Anthem en á E3 í fyrra voru sýnd tvö sýnishorn úr leiknum; stutt kitla og lengra sýnishorn. Í Anthem hefur spilarinn það markmið að kanna svæðin í kring um sitt heimasvæði, og vernda mannkynið! Hver persóna klæðist „power suit“ sem hægt er að breyta og aðlaga. Búningurinn virkar sem brynja, inniheldur vopn og þotubagga. Þessi þriðju persónu hasar- skotleikur er væntanlegur í verslanir fyrri hluta árs 2019.