Nú þegar snjókorn falla á allt og alla, hátíðarbragur að koma til byggða og undirbúningur í hámarki fyrir aukakílóin er upplagt að skoða hvaða tölvuleikir stóðu hvað mest upp úr á árinu. Heimasíðan VGChartz tók saman og gerði lista yfir mest seldu leiki og leikjavélar yfir árið, sem gefur góða vísbendingu hvaða leikir voru vinsælastir.
Ef listinn fyrir Evrópu er skoðaður þá er FIFA 15 klárlega vinsælasti leikur ársins. Ef litið er á topp tíu mest seldu leikina þá er FIFA 15 með fjögur pláss á listanum, mætti halda að Evrópa hefði gaman af fótbolta. Þrátt fyrir að COD leikirnir hafi dalað í sölu á milli ára þá nær Call of Duty: Advanced Warfare tveimur sætum á toppnum, en virðist þó ekki vera eins vinsæll á Xbox eins og á PlayStation. Þrátt fyrir að Watch_Dogs hafi ekki tekist að uppfylla það auglýsingaskrum sem fylgdi leiknum þá tókst honum að vera meðal þeirra efstu. En hann er búinn að vera hvað lengst í sölu í samanburði við aðra leiki. Þó tveimur vikum minna en Minecraft fyrir PS3, sem sýnir að vinsældir leiksins eru ekkert að minnka. Hinn magnaði skotleikur Destiny, þar sem spilarar eru enn leita af söguþræðinum, tókst einnig að komast á topp tíu. Skiljanlega þar sem leikurinn sló mörg sölumet, þ.á.m. sem mest forpantaði leikur á netinu. Svo má ekki gleyma fimmta leiknum í GTA seríunni, þar sem besti leikur síðasta árs var endurgerður fyrir Xbox One og PS4. Í fyrsta sinn er hægt að spila leikinn í fyrstu persónu sem gerir frábærann leik enn betri og því ekki skrítið að hann sé á þessum lista.
Þegar listinn er skoðaður í heild má sjá að 2014 var mjög gott tölvuleikjaár með helling af rafrænni skemmtun að velja úr. Svo virðist sem felstar leikjatölvurnar hafi blómstrað á árinu. Þó Nintendo sé aðeins með 17 leiki á listanum þá er áhugavert að enginn leikur fyrir PlayStation Vita eða PSP er sjáanlegur. Sem sýnir yfirburði Nintendo í þeim flokki, enda frekar erfitt að keppa við leiki á borð við Super Smash Bros, Pokémon og Legend of Zelda. Ekki skemmir að geta náð í gamla retro leiki sem svala nostalgíu þörfinni.
Að sjálfsögðu eru allir helstu skotleikir á listanum sem koma út með reglulegu millibili. Þeir skotleikir sem standa hvað mest upp úr eru klárlega GTA V, Far Cry 4, Titanfall og Wolfenstein: The New Order. Nokkuð var um endurgerðir á tölvuleikjum á árinu, þar sem leikir af eldri kynslóð leikjavéla fengu andlitslyftingu fyrir núverandi kynslóð. Þrátt fyrir að Tomb Raider: Definitive Edition og The Last of Us Remastered hafi komið sterkir inn þá hefur Halo: The Master Chief Collection vinningin sem besta endurgerðin á árinu.
Hlutverka- og ævintýra leikir eru oft jafn heillandi og þeir eru ávanabindandi. Það er virkilega gaman að Dragon Age: Inquisition hefur snúið á gamlar slóðir og minnir mikið á fyrsta leikinn í seríunni. Assassin’s Creed stóð fyrir sínu þrátt fyrir að ýmsir gallar hafi fylgt Unity í upphafi, sem hafa verið lagaðir að mestu leiti með uppfærslum. Oft er Lord of the Rings partur af jólahefð hjá mörgum, því er upplagt að spila Middle-Earth: Shadow of Mordor og taka síðan LOTR maraþon eftir að hafa horft á allar Hobbita myndirnar.
En hvaða leikir voru bestir á árinu að þínu mati?
Endilega settu komment hér fyrir neðan og segðu okkur hvaða leikir stóðu upp úr á árinu.
Í lokin vil ég óska öllum lesendum Nörd Norðursins gleðilegrar hátíðar og farsældar á nýju nörda ári.
Forsíðumynd: Shadow of Mordor
Höfundur er Helgi Freyr Hafþórsson,
fastur penni á Nörd Norðursins.