Myndasögurýni: Age of Ultron

Athugið: Inniheldur minniháttar spilla.

Age of Ultron: Ruglingslegasti viðburður ársins.

Núna fyrir stuttu var nýjasti viðburður Marvel: Age of Ultron að klárast en hann er búinn að vera í gangi síðan í mars. Þetta var viðburður sem ég var búinn að vera spenntur fyrir í nokkra mánuði því að Ultron er svo kraftmikill og góður karakter. Vilji hans er að eyðileggja það sem hann telur tilgangslaus, þar á meðal mannkynið.

Mjög hæfileikaríkt fólk stendur að þessum viðburði en þessvegna er það enn leiðinlegra hversu ruglandi og lélegur viðburðurinn var. Brian Michael Bendis er penninn sem stendur að AoU en hann hefur t.d. skrifað Ultimate Spider-Man og House of M. Bryan Hitch tekur að sér að teikna fystu fimm blöðin í seríunni en hann hefur teiknað The Ultimates seríuna fyrir Marvel og JLA fyrir DC Comics. Brandon Peterson teiknar blöð sex-átta. Hann hefur áður teiknað Uncanny X-Men. Síðustu blöðin teikna síðan Carlos Pacheco og Joe Queasada.

Fyrir þá sem ekki vita er Ultron gervigreind sem var sköpuð af Hank Pym.

Age of Ultron Viðburðurinn byrjar bæði vel og ruglingslega, á fyrstu blaðsíðu fyrsta blaðsins er New York borg sýnd þar sem hún er gjöreyðilögð. Vondir sem góðir berjast um að lifa af því Ultron er allstaðar og sér allt, þannig að hetjur á borð við Iron Man, Spider Man og Captain America þurfa að fela sig í holræsi. Eins og ég segi þá byrjar þetta afskaplega vel, sérstaklega þegar maður sér mynd af Captain America buguðum. Það er svo ruglingslegt hvernig þetta kemur uppúr þurru, það er ekkert sem útskýrir af hverju þessi viðburður byrjar og það er eins og hann hafi engin áhrif á aðra titla Marvel.

Það eru jú auðvitað „tie-inn“ eins og Fantastic Four og Wolverine and the X-men en það er alveg eins og með allan viðburðinn, að þetta kemur bara uppúr þurru og brýtur upp flæðið í þeim seríum. Þegar fer að líða á söguna koma fleiri ofurhetjur við sögu. Nick Fury ásamt Captain America, Iron Man, Quicksilver, Storm, Red Hulk, Daisy Johnson og Black Widow ákveða að fara fram í tímann þar sem Ultron er að stjórna atburðarás nútímans. Wolverine er hins vegar ekki samála félögum sínum og fer á flakk aftur í tímann með Sue Storm, þetta endar allt í ósköpum auðvitað og Marvel heimurinn fer í rugl. Blað 8 og 9 bjarga þessum viðburði næstum því. Því þótt þau séu ruglandi og skrítin þá eru þau vel skrifuð og skemmtanagildið í þeim er alveg til staðar, annað en það var í restinni.

Eftir þennan leiðinlega og ruglandi viðburð var maður að vona að Marvel menn myndu allavegna taka sig til og enda þetta vel. Það gerðu þeir hinsvegar ekki. Þegar öllu er á botninn hvolft kemur í ljós að þessi viðburður var bara „setup“ fyrir aðra titla Marvel og skipti þannig séð engu máli sem saga í sjálfu sér. Allt í einu er Angela karakter úr Image Comics komin í Marvel heiminn og á að byrja í Guardians of the Galaxy (hún mun koma í Guardians of the Galaxy #5) og Galactus er kominn í Ultimate Universe (serían Hunger, sem er væntanleg á þessu ári).

Viðburðurinn fær 2.5 af 5 í einkunn því þótt að það séu nokkur góð blöð inná milli sem ættu skilið hærri einkunn þá var maður alltaf að bíða eftir útskýringum á atburðarásinni sem maður fékk bara ekki. Það verður hins vegar ekki tekið frá AoU að það er mjög vel teiknað og litað en það vegur því miður ekki mikið á móti lélegu sögunni. Oft getur verið áhættusamt að gera tímaflakkssögu en þær enda oft á því að verða torskiljanlegar en það gerðist einmitt núna. Vonbrigðin eru gríðarleg því þetta er svo góð hugmynd sem er því miður illa framkvæmd. Vonandi verður næsti viðburður Marvel betri.