Spurt og spilað: Páll Óskar
Í liðnum Spurt og spilað forvitnast Nörd Norðursins um tölvuleikjaspilun þjóðþekktra einstaklinga með stuttum spurningum. Okkar þriðji viðmælandi er Páll Óskar Hjálmtýsson.
Páll Óskar er einn ástsælasti söngvari þjóðarinnar og byrjaði ungur að árum að syngja. Eftir hann liggja fjölmargar hljómplötur sem ná til breiðs hóps hlustenda. Páll Óskar er einnig þekktur fyrir að halda uppi hörkustuði á tónleikum, bæði sem tónlistarflytjandi og plötusnúður.
Lögin „Allt fyrir ástina“, „International“, „Betra líf“ og „Er þetta ást?“ eru meðal þeirra fjölmörgu laga sem hafa náð miklum vinsældum hér á landi. Páll Óskar hefur farið um víðan völl og hefur m.a. stýrt útvarpsþáttunum Dr. Love og Eurovisionþættinum Alla leið, ásamt því að vera dómari í Idol Stjörnuleit og X-Factor á Íslandi. Páll Óskar hefur einnig verið áberandi í réttindarbaráttu samkynhneigra hér á landi.
Hverskonar tölvuleiki spilaru helst?
- Ég spila nær aldrei tölvuleiki. Horfi bara á DVD, hlusta mikið á músik og les einstöku bækur. Ég fíla miklu betur alvöru PINBALL kúluspil eins og í gamla daga. Er að spá í að kaupa mér eitt slíkt á eBay og hafa sem stofustáss heima hjá mér. Helst „Guns-n-Roses“ kúluspilið. Það er geðveikt.
Uppáhalds tölvuleikur?
- Manic Miner fyrir Sinclair Spectrum 48K.
Fyrsta leikjatölvan?
- Það var reyndar lítið vasatölvuspil frá Nintendo sem hét „Fire“. Maður átti að grípa litla karla sem voru að stökkva úr brennandi húsi. Án efa síðan 1982. Telst það með?
Uppáhalds leikjatölvan?
- Ég fékk Playstation 3 í jólagjöf núna síðast. Hef leikið mér í henni nákvæmlega þrisvar sinnum síðan þá og horft á nákvæmlega 3 Blu-Ray diska í henni. Kvikmyndin DRIVE var algert tripp að horfa á. En ég er ekki að verða háður þessum PS3 leikjum. Þeir eru ekki að grípa mig.
Eitthvað að lokum?
- Já. Lífið er allt of fallegt og margbreytilegt til að eyða því fyrir framan tölvuskjá.
Nörd Norðursins vill að lokum benda á alla þá fegurð, (tón)list, og lærdóm sem er að finna í tölvuleikjum. Við eyðum ekki tíma fyrir framan tölvuskjáinn – við njótum hans 😉
– BÞJ
Þú hefur kannski áhuga á þessu...
Spurt og spilað: Bjössi í Gamestöðinni →
Leikjavarpið #26 – Ratchet & Clank, Steam Deck og Activision Blizzard kæran →
Ring Fit áskorun í febrúar! →
