Forsetaframbjóðendur svara spurningum Nörd Norðursins
Síðastliðinn mánudag hafði Nörd Norðursins samband við alla forsetaframbjóðendurna og lagði fram fjórar mikilvægar spurningar sem tengjast málefnum sem snertir okkur öll – eins og hvernig myndi verðandi forseti bregðast við uppvakningaárásum á Íslandi?
Þrír af sex forsetaframbjóðendum svöruðu spurningunum, en svör þeirra frambjóðenda sem hafa ekki svarað verða birt um leið og þau berast. Svör forsetaframbjóðenda eru birt í þeirri röð sem þau bárust.
Forsetakosningarnar verða haldnar 30. júní 2012.
Hannes Bjarnason
Sem forseti Íslands, hvernig myndir þú bregðast við ef Svarthöfði og hans nánasta fylgdarlið myndi óska eftir kvöldverði með forsetanum á Bessastöðum?
Bessastaðir væru ekki nóg fyrir slíka höfðingja. Mundi fara með þá að góðu hverasvæði. Þar fengju þeir í forrétt hverasoðin egg og aðalrétt hverasoðið slátur. Í eftirrétt yrðu köld svið. Ekki dónalegt fyrir Svarthöfða og fylgdarlið….
Ef svo óheppilega vildi til að uppvakningar myndu rísa úr gröfum sínum og ráðast á almenning í landinu, hvernig myndir þú sem forseti Íslands bregðast við?
Mundi fara á fund allra mestu galdrahöfðingja á Íslandi (kvenna og karla), safna liði og láta slag standa. Nú ef ekki næðist í það góða fólk mundi ég fara sjálfur á móti draugsa – og hafa betur….
Ef þú hefðir aðgang að tímavél myndiru ferðast aftur í tímann? Og ef svo er, til hvaða tíma myndiru ferðast og hvers vegna?
Þá mundi ég vilja fara aftur til þess tíma er Gissur Þorvaldsson fór erindi Noregskonungs og gaf honum landið. Það var glapræði að gera…
Hver er þín uppáhalds vísindaskáldsaga?
Það er varla hægt að kalla „Grímur nýrri“ vísindaskáldsögu. Engu að síður eru þar stórkostlegar sögur af útilegumönnum, sjóræningjum, göldrum og aðrar góðar frásagnir sem lifað hafa með þjóðinni. Stórkostlegt lesefni….
Ari Trausti Guðmundsson
Sem forseti Íslands, hvernig myndir þú bregðast við ef Svarthöfði og hans nánasta fylgdarlið myndi óska eftir kvöldverði með forsetanum á Bessastöðum?
Fá mér geislasverð og taka í lurginn á þessum óvini friðsældar og mannúðar.
Ef svo óheppilega vildi til að uppvakningar myndu rísa úr gröfum sínum og ráðast á almenning í landinu, hvernig myndir þú sem forseti Íslands bregðast við?
Ég þekki tíbetskan munk sem kann á uppvakninga – myndi senda eftir honum og klára dæmið.
Ef þú hefðir aðgang að tímavél myndiru ferðast aftur í tímann? Og ef svo er, til hvaða tíma myndiru ferðast og hvers vegna?
Færi fyrst aftur fyrir árið 870 til að athuga hvort byggð væri í landinu en svo nær okkur til að hitta Leonardo da Vinci með viðkomu á Englandi til að komast að því hver Sjeikspír var í raun og veru.
Hver er þín uppáhalds vísindaskáldsaga?
Ferðin í iður jarðar eftir Jules Verne.
Þóra Arnórsdóttir
Sem forseti Íslands, hvernig myndir þú bregðast við ef Svarthöfði og hans nánasta fylgdarlið myndi óska eftir kvöldverði með forsetanum á Bessastöðum?
Ég myndi fletta upp í nýju siðareglunum og athuga hvort það samræmdist hlutverki forseta Íslands að taka sérstaklega á móti slíkum gestum og veita þeim beina á Bessastöðum. Ég myndi líka athuga hvort Hans Óli væri nokkuð inni í eldhúsi að drekka kaffi með Svavari.
Ef svo óheppilega vildi til að uppvakningar myndu rísa úr gröfum sínum og ráðast á almenning í landinu, hvernig myndir þú sem forseti Íslands bregðast við?
Ég gúglaði tíu bestu leiðirnar til að losa sig við uppvakninga og ég held að þær fari allar í bága við 124. grein almennra hegningarlaga um ósæmilega meðferð á líki. Mér væri því líklega talsverður vandi á höndum. Ef netið lægi niðri myndi ég fara út á vídeóleigu og leigja eina eða tvær uppvakningamyndir, horfa á þær og taka glósur. Svo myndi ég ávarpa þjóðina og ráðleggja eftir bestu getu.
Ef þú hefðir aðgang að tímavél myndiru ferðast aftur í tímann? Og ef svo er, til hvaða tíma myndiru ferðast og hvers vegna?
Ég myndi vilja vera á stöðugu tímaferðalagi. Það eru svo margir viðburðir, bæði í heims- og fjölskyldusögunni sem maður myndi vilja vera viðstaddur. Einmitt núna langar mig til að upplifa 29.-30. júní 1980, þegar Íslendingar kusu Vigdísi Finnbogadóttur í forsetakosningum og fögnuðu kjöri hennar. Svo myndi ég kíkja aftur á landnámsöld og sá hvernig landið var þá og spjalla við Ingólf Arnarsson. Svo færi ég kannski aftur til 1978 með Svavar á Bob Marley tónleika.
Hver er þín uppáhalds vísindaskáldsaga?
The Hitchhiker’s Guide to the Galaxy. Og já, svarið við öllum ofangreindum spurningum og öðrum sem þú gætir hugsað þér að bera upp gæti mjög vel verið 42. Það segir sig sjálft.
Þú hefur kannski áhuga á þessu...
Leikjavarpið #26 – Ratchet & Clank, Steam Deck og Activision Blizzard kæran →
Leikjavarpið #24 – Afmæli, martraðir og pöddusnakk →
Nörd Norðursins tekur yfir GameTíví í kvöld →
