Höfundur er Bjarki Þór Jónsson, tölvuleikjafræðingur og ritstjóri Nörd Norðursins
Fréttaskýringarþátturinn Kveikur fjallaði um tölvuleiki og leikjamenningu í nýjasta þætti sínum sem sýndur var á RÚV, þriðjudaginn 29. október. Með yfirvegaðri nálgun náðist að fjalla um tölvuleiki á faglegan og sanngjarnan hátt.
Í þættinum var meðal annars sagt frá áhrifamikilli sögu Mats, fötluðum norskum dreng sem var háður hjólastól og upplifði skert lífsgæði. Mats eignaðist þó marga vini í gegnum fjölspilunarleikinn World of Warcraft, en þegar Mats lést árið 2014 kynntust foreldrar Mats vinahópi sonar síns í fyrsta sinn, en undanfarin tíu ár hafði Mats varið um 15.000 – 20.000 klukkustundum með umræddum vinahópi í ævintýraheimi World of Warcraft. Fjölspilunarleikir geta skapað kjörið tækifæri fyrir fólk til að hittast og mynda vinskap sín á milli. En þar hættir aldur, kyn, fötlun eða húðlitur að skipta máli þar sem þú býrð til þinn eigin avatar. Hægt er að lesa sögu Mats í heild sinni á fréttavefnum BBC News. Einnig var fjallað um rafíþróttir á Íslandi og mikilvægi þess að foreldrar sýni áhugamálum barna sinna áhuga.
Því miður hafa fjölmiðlar, ekki bara íslenskir heldur einnig erlendir, verið óþarflega duglegir við að birta neikvæðar fréttir sem byggja ekki á traustum heimildum, heldur eru matreiddar sem ódýrar smellubeitur.
Það er alltaf ánægjulegt að sjá vandaða umfjöllun um tölvuleiki og leikjamenningu í íslenskum fjölmiðli. Því miður hafa fjölmiðlar, ekki bara íslenskir heldur einnig erlendir, verið óþarflega duglegir við að birta neikvæðar fréttir sem byggja ekki á traustum heimildum, heldur eru matreiddar sem ódýrar smellubeitur. Þar má nefna órökstudd tengsl milli tölvuleikjaspilunar og ofbeldisverka og einkennilegar staðhæfingar á svokallaðri tölvuleikjafíkn – þrátt fyrir að rannsóknir sýna (m.a. þessi nýlega rannsókn frá Oxford háskólanum) einmitt að yfirleitt eru önnur vandamál utan leikjaheimsins sem ýta undir spilun sem fer úr böndunum, en ekki tölvuleikirnir sjálfir. Oft skortir skynsama og yfirvegaða umfjöllun um tölvuleiki og nördamenningu almennt, og er það einmitt ein helsta ástæða þess að Nörd Norðursins var sett á laggirnar á sínum tíma (2011). Sem betur fer hefur umfjöllunin skánað umtalsvert síðan þá.
Í dag spilar yfir helmingur Íslendinga tölvuleiki og tölvuleikir eru fyrir löngu orðnir hluti af okkar daglega lífi og okkar menningu. Tölvuleikir eiga hreinlega skilið að fá meiri og yfirvegaðri umfjöllun í fjölmiðlum, líkt og bókmenntir, tónlist, kvikmyndir, leikhús, myndlist, íþróttir og fleira.
Smelltu hér til að horfa á umræddan þátt af Kveik.
Vilt þú senda inn pistil eða hugleiðingu um málefni líðandi stundar? Sendu póst á nordnordursins(at)gmail.com.