Svartir Sunnudagar snúa aftur með tvöfaldar sýningar
Svartir Sunnudagar snúa aftur í vetur með tvöfaldar sýningar en þeir hefja leikinn sunnudaginn 12. október, en þá verða Barbarella og Danger: Diabolik á dagskrá. Þeir Hugleikur Dagsson og Sigurjónarnir tveir, Kjartansson og Sigurðsson (Sjón) er stofnuðu kult og klassík hópinn Svarta sunnudaga, munu standa fyrir kvikmyndasýningum í Bíó Paradís í vetur. Síðasti vetur gekk vonum framar, þar sem fjöldinn allur mætti á mjög fjölbreytta og beitta dagskrá sem í boði var.
Hægt er að fylgjast með dagskrá Svartra Sunnudaga á heimasíðu Bíó Paradísar og Facebook-síðu Svartra Sunnudaga.
Dagskráin er með örlitlu breyttu sniði í vetur en Svartir Sunnudagar hefja leikinn þann 12. október með tvöfaldri sýningu og eru annars fyrsta sunnudag hvers mánaðar með tvöfalda sýningu kl 20:00 og kl 22:00, auk tvöfaldrar jólasýningar þann 26. desember og tvöfaldrar lokasýningar sem jafnframt verður plakatasölusýning vorið 2015. Fyrir hverja tvöfalda sýningu sjá nýir listamenn um plakatahönnun Svartra Sunnudaga, og er sölusýning þeirra plakata síðastliðins veturs aðgengileg í innra rými Bíó Paradís. Fyrir þeim félögum vakir að auðga bíómenningu borgarinnar og njóta lífsgæðanna sem felast í því að klassískar kult myndir séu sýndar í reykvískum bíósal – með tvöföldum sýningum í hvert sinn.
BARBARELLA
Í framtíðartryllinum Barbarella, glímir ofur kynæsandi kona við það verkefni að stoppa hin illa Durand- Durand. Á leið sinni hittir hún marga skringilega karaktera. Jane Fonda sem Barbarella, ekki missa af Svörtum Sunnudögum þann 12. október, myndin er sýnd kl 20:00.
DANGER: DIABOLIK
Ofurþjófur á í fullu fangi með að stela skartgripum, gulli ásamt því að myrða saklaust fólk. Diabolik og Eva kærastan hans búa í James Bond-legu neðanjarðarbyrgi, synda um í peningum og stela öllu steini léttara án samviskubits. Ekki missa af Svörtum Sunnudögum þann 12. október en myndin er sýnd kl 22:00.
– Fréttatilkynning frá Bíó Paradís
Þú hefur kannski áhuga á þessu...
Kvikmyndahátíðin RIFF hafin í Reykjavík →
Plakatsýning Svartra Sunnudaga – Plaköt til sýnis frá upphafi →
Tim Burton veisla í Bíó Paradís annan í jólum →
