Í liðnum Spurt og spilað forvitnast Nörd Norðursins um tölvuleikjaspilun þjóðþekktra einstaklinga með stuttum spurningum. Okkar sjötti viðmælandi er Sverrir Bergmann Magnússon.
Sverrir er annar þáttastjórnandi vinsælasta tölvuleikjaþáttar landsins, GameTíví, þar sem hann ásamt Ólafi Þór gagnrýnir tölvuleiki og skoðar það helsta sem er að gerast í heimi tölvuleikja og leikjatölva að hverju sinni. Það er óhætt að segja að þættirnir hafa styrkt samfélag leikjatölvunotenda og tölvuleikjaspilara á Íslandi, en hægt er að horfa á upptökur af GameTíví hér á Visir.is. Sverrir og Ólafur eru einnig umsjónarmenn í nýjum morgunþætti sem hóf göngu sína fyrr í þessum mánuði á FM957.
Sverrir er auk þess landsþekktur tónlistarmaður sem sló eftirminnilega í gegn með laginu Án þín sem hann söng í Söngvakeppni framhaldsskólanna árið 2000. Sverrir hefur gefið út nokkrar plötur, þar á meðal Fallið Lauf sem kom í verslanir í fyrra og er það fyrsta plata Sverris þar sem hann syngur á íslensku.
Hverskonar tölvuleiki spilaru helst?
- Ég er mest fyrir RPG leiki. Ef ég get búið til dverg í leiknum þá er ég ALL IN. Ég var mikið WoW nörd á sínum tíma. Núna virðist ég vera að detta meira og meira í hack n slash týpurnar.
Uppáhalds tölvuleikur?
- Red Dead Redemption er líklega minn uppáhaldsleikur.
Uppáhalds símaleikurinn?
- Candy Crush... helvítis Candy Crush... óþolandi ávanabindandi :|
Fyrsta leikjatölvan?
- Famicom var mín fyrsta vél. Við vorum ekki alveg að eyða peningum í alvöru NES vél þannig að ég byrjaði á þessu. Reyndar átti ég líka Sinclair Spectrum og Commandor 64 þar á undan ef þær flokkast undir leikjatölvur :)
Uppáhalds leikjatölvan?
- PS3 er í miklu uppáhaldi sem og Super Nintendo og N64 eiga líka alltar fastan stað í nörda hjartanu.
Eitthvað að lokum?
- Ekki missa af GameTíví í haust :D