Nú styttist í að PlayStation 4 fari í almenna sölu hér á landi. Að því tilefni fékk ég Ágúst Guðbjartsson, framkvæmdastjóra Skífunnar og Gamestöðvarinnar, í stutt spjall. Gamestöðin er eina verslunin á Íslandi sem sérhæfir sig sölu tölvuleikja og leikjatölva hér á landi. Fyrir stuttu opnaði ný verslun í Smáralind þar sem viðskiptavinir geta fengið sér sæti, slappað af og spilað tölvuleiki í sérstöku leikjaherbergi sem hefur hlotið góðar móttökur að sögn Ágústs.
Í Bandaríkjunum og Evrópu er nokkuð hörð samkeppni milli Xbox One og PlayStation 4 leikjatölvanna frá Microsoft og Sony. Þó svo að Xbox One sé dýrari kosturinn er verðálagningin á Xbox One áberandi meiri en á PS4 hér á landi. En hvernig stendur á því? „PlayStation 4 kom út með íslenskum innflytjanda sem fer í gegnum Sony. Xbox One var í raun og veru bara til að koma á móts við kúnnana okkar og fá vélina til landsins, en það er enginn sem dreyfir henni á Íslandi. Við þurftum að kaupa hana í gegnum þriðja aðila.“ útskýrir Ágúst.
Í dag kostar Xbox One 129.999 kr. í Gamestöðinni á meðan verðið á PlayStation 4 lækkaði nýlega niður í 79.999 kr. vegna hagstæðs gengis krónunnar, en hefur þessi mikli verðmunur ekki áhrif á sölu Xbox One og PS4? „Munurinn er auðvitað svaðalegur, við erum að tala um 45.000 kr. mun á vél og þú réttlætir það ekki bara með Kinect. Og svo er Ísland náttúrulega PlayStation land, við vitum það alveg, þar sem um 85% af markaðnum er PlayStation. Microsoft hefur svo sem engann áhuga á svona minni löndum eins og Íslandi.“
Ég spyr Ágúst hvort mögulega sé verðstríð í vændum á íslenskum tölvuleikjamarkaði, en hann telur að svo sé ólíklegt sökum þess að sala á leikjatölvunni skili ekki inn neinum hagnaði til verslana. Í raun þyrftu verslanir að greiða með vörunni ef það ætti að lækka verðið á PS4 enn frekar að sögn Ágústs.
Þess ber að geta að Gamestöðin verður með sérstaka PS4 kvöldopnun næstkomandi þriðjudag. „Við byrjum að afhenda klukkan níu á þriðjudagskvöldi, official dagurinn er miðvikudagurinn, þetta verður svona basic kvöldopnun.“ segir Ágúst. „Við verðum með kók á staðnum og gefum bíómiða á myndina Her, tveir miðar með hverri vél, og svo erum við að gefa vélina á Feisbúkkinu hjá okkur. Auk þess endurgreiðum við tvær vélar sem keyptar verða á kvöldopnuninni.“
Smelltu hér til að lesa PS4 umfjöllun okkar
Forsíðumynd: Móberg / Gamestöðin á Facebook
Höfundur er Bjarki Þór Jónsson,
ritstjóri Nörd Norðursins.