Heklar tölvuleikjabangsa og fann ástina í World of Warcraft – Viðtal við Moa Särås
Ég lærði að hekla árið 2021 þegar ég eignaðist mitt fyrsta barn. Ég þurfti að finna mér eitthvað tómstundargaman á meðan ég var að sinna barninu, þá fór ég að búa til bangsa…
Sölubás sem innihélt ofurkrúttlega tölvuleikjabangsa fangaði athygli okkar á dögunum. Á bakvið básinn var hin 27 ára Moa Särås, sem hefur undanfarin þrjú ár verið að hekla allskonar bangsa. Við heyrðum í Mou og spurðum hana út í hvernig það kom til að hún fór að hekla tölvuleikjabangsa og hvar áhugasamir geta skoðað og keypt bangsa eftir hana.
„Ég lærði að hekla árið 2021 þegar ég eignaðist mitt fyrsta barn. Ég þurfti að finna mér eitthvað tómstundargaman á meðan ég var að sinna barninu, þá fór ég að búa til bangsa og byrjaði svo að selja þá 2023“ segir Moa þegar við spyrjum hana hve lengi hún hefur verið að búa til þessa krúttlegu bangsa.
En af hverju tölvuleikjabangsa en ekki bara hefðbundna bangsa? „Ég spilaði tölvuleiki mikið áður en ég eignaðist börn, eitthvað sem ég geri aðeins núna þegar tími gefst til. Það er auðveldara að leggja heklið frá sér en tölvuleiki þar sem ég dett djúpt inn í leikina þegar ég spila þá. Ég elska klassíska leiki, eins og Spyro, Crash Bandicoot, Super Mario og fleira. Ég elskaði The Legend of Zelda: Breath of the Wild! Ég náði meira að segja gullkúknum! Núna er ég að spila Hogwarts Legacy. Þegar ég spila leiki vil ég klára þá alveg og gef mér góðan tíma til að spila leikinn og safna öllum hlutum.“
Þegar ég spila leiki vil ég klára þá alveg og gef mér góðan tíma til að spila leikinn og safna öllum hlutum.
Moa er stundum með sölubás á Akranesi og Reykjavík þar sem hægt er að kaupa bangsa hjá henni. Hægt að skoða alla bangsa Mou á Instagram. „Það er nóg að kommenta undir mynd af því sem þú hefur áhuga á að kaupa og ég læt þig vita í kjölfarið hvað bangsinn kostar. Ég tek einnig við pöntunum. Verð fer svolítið eftir því hvað ég er að búa til, hvaða efni er notað og hve tímafrekt og flókið verkefnið er. Til dæmis kostar Majora’s Mask úr Zelda meira en Yoshi þar sem gríman er töluvert flóknari. Akkúrat núna er ég að hekla Sylvanas og Charizard.“
Tölvuleikir eru ekki aðeins innblástur að böngsum Mou heldur fann hún ástina einnig í tölvuleik. „Ég er 27 ára og upprunlega frá Svíþjóð, ég kynntist maka mínum í gegnum World of Warcraft og flutti hingað til Íslands. Við búum á Akranesi og ég starfa hjá Össur. Ég er menntuð á sviði CNC og forritun en gef mér tíma til að sinna skapandi tómstundum.“
Hægt er að skoða bangsana á Instagram-síðu Moa Särås sem kallast mistypeaks_stitchandcraft. Moa er stundum að streyma á Twitch undir nafninu mistypeaksstream. Vefsíða og YouTube-rás er einnig í vinnslu að sögn Mou.
Við þökkum Mou kærlega fyrir viðtalið og mælum með að skoða Instagram-síðuna hennar!
Þú hefur kannski áhuga á þessu...
Leikjavarpið #50 – Zelda: Echoes of Wisdom og Xbox Partner Preview →
Sýnir mýkri hlið vondukallanna með blómaskreytingum – Viðtal við Ragnheiði Ýr →
Ísland sögusvið víkingaleiksins Landnáma – Viðtal við Mathias Tournier hjá Sonderland →
