Leikjavarpið #32 – Guardians of the Galaxy, State of Play og Nintendo Expansion Pack

Þrítugasti og annar þáttur af Leikjavarpinu, hlaðvarpi Nörd Norðursins, er nú kominn á allar helstu hlaðvarpsveitur. Að þessu sinni eru það Sveinn Aðalsteinn, Daníel Rósinkrans og Bjarki Þór sem eru mættir til að ræða um allt það helst úr heimi tölvuleikja. Það er úr ýmsu að taka og má þar meðal annars nefna nýjar fréttir varðandi útgáfu Cyberpunk 2077 og The Witcher en útgáfusaga Cyberpunk 2077 virðist vera sagan endalausa. Strákarnir rýna í nýju stikluna úr Uncharted kvikmyndinni en það er enginn annar en Tom Holland sem fer með hlutverk Nathan Drake í myndinni og ekki allir í hópnum sammála með hve vel sá leikari passar í hlutverkið.

Endurútgáfa GTA þríleiksins (GTA III, Grand Theft Auto: Vice City og Grand Theft Auto: San Andreas) er væntanleg og ákveðin spenna sem fylgir því enda marka þessir leikir ákveðin tímamót í GTA-seríunni. Rósinkrans segir okkur frá Nintendo Expansion Pack en þar geta Nintendo Switch eigendur fengið aðgang að gömlum N64-leikjum gegn gjaldi.

Sveinn segir okkur aðeins frá nýjasta Football Manager leiknum en beta-útgáfa leiksins er nú aðgengileg víða en formlegur útgáfudagur Football Manager 2022 er 9. nóvember næstkomandi. Sveinn fjallar einnig um og gagnrýnir Marvel-leikinn Guardians of the Galaxy en The Avengers tölvuleikurinn náði ekki alveg að standast væntingar líkt og kom fram í 14. þætti Leikjavarpsins og því spurning hvernig Guardians of the Galaxy kemur út.

Allt þetta og margt fleira í nýjasta þætti Leikjavarpsins!

Efni þáttar:

Cyberpunk og Witcher uppfærslurrnar seinkað
Fyrsta stiklan fyrir Uncharted kvikmyndina skoðuð
God of War væntanlegur á PC
GTA þríleikurinn væntanlegur á þessu ári
Nintendo Expansion Pack nú fáanlegt
Sveinn gagnrýnir Guardians of the Galaxy
State of Play yfirferð – væntanlegir leikir á PlayStation
(Leikjaklúbburinn geymir umfjöllun og spilar áfram Paper, Please fyrir næsta þátt)