Pokémon GO nú aðgengilegur á Íslandi!

Biðin er á enda! Nú geta íslenskir notendur sótt sér Pokémon GO leikinn með hefðbundinni leið í gegnum Google Play eða App Store. Leikurinn hefur verið að slá í gegn undanfarna daga í Bandaríkjunum og Ástralíu en útgáfu í Evrópu og víðar var frestað tímabundið vegna of mikils álags á netþjónum sem tegnjast leiknum. Fyrir u.þ.b. þrem dögum síðan kom leikurinn til Þýskalands, stuttu síðar til Bretlands og nú er hann kominn til Íslands og víðar í Evrópu. Fjölmargir Evrópubúar hafa þó nú þegar sótt sér leikinn með óhefðbundnum leiðum, en nú getur hver sem er sótt leikinn án vandræða í gegnum áðurnefndar app-verslanir.

Pokémon GO er gagnaukinn veruleikaleikur (AR, eða augmented reality) sem þýðir að leikurinn bætir leikjahlutum við raunveruleikann. Í leiknum þurfa spilarar að komast á milli staða í raunveruleikanum til að fanga og rækta Pokémona (ekki ólíkt Ingress). Leikurinn er eitt heitasta umræðuefnið í netheimum í dag enda hefur leikurinn náð miklum vinsældum og hafa margar milljónir notenda nú þegar sótt leikinn. Til að mynda hækkuðu hlutbréf Nintendo samhliða útgáfu leiksins, spilarar í Bandaríkjunum fundu óvænt lík, í fleirtölu, á meðan þau spiluðu leikinn, leikurinn hvetur spilara til að fara út og hreyfa sig og virðist hann auk þess hafa jákvæð áhrif á andlega líðan spilara.

Uppfært 16. júlí 2016, kl. 17:05

Margir notendur hafa kvartað yfir því að geta ekki sótt leikinn eða náðu að sækja leikinn en komast ekki inní hann vegna álags á netþjónum. Við höfum prófað þetta á okkar tækjum og fáum reglulega upp villuskilaboð og nokkuð handahófskennt hvenær leikurinn virkar og hvenær ekki. Við munum fylgjast með framgangi mála og vonumst til að þetta verði lagfært fljótlega.

Uppfært 17. júlí 2016, kl. 10:52

Í gærkvöldi var leikurinn orðinn nokkuð stabíll en enn voru þó einhverjir notendur enn að lenda í vandræðum. Þegar fór að líða á kvöldið virtust flestir komast inní leikinn svo það má gera ráð fyrir því að Niantic, fyrirtækið sem gerði Pokémon GO, hafi náð að lagfæra vandamálið sem snérist að mestu leyti að álagi á netþjóna leiksins.

Ætlar þú að sækja Pokémon GO leikinn?