Eflaust muna margir lesendur Nörd Norðursins eftir leiktækjasalnum Fredda bar sem naut mikilla vinsælda rétt fyrir aldamót. En þær gleðifréttir voru að berast að Freddi mun snúa aftur og opnar næstkomandi föstudag! Mikill skortur hefur verið á góðum spilakassasal á Íslandi og þess vegna eru þetta frábærar fréttir fyrir okkur leikjanördana.
Fredda bar var með flott úrval af spilakössum á sínum tíma en samkvæmt frétt DV mun nýji staðurinn bjóða uppá fjölbreytt efni, gamalt og nýtt. Þar ber að nefna klassíska spilakassa á borð við Mortal Kombat, NBA, Donkey Kong og Pac-Man, sjö kúluspil, auk þess sem gestir geta leigt sérstök herbergi til að spila tölvuleiki á borð við FIFA 15 og Mario Bros. Einnig verða seld He-Man, ET, Star Wars og fleiri gömul leikföng sem eiga eflaust eftir að fylla mörg nördahjörtu af nostalgíu.
Opnunartími hefur ekki enn verið auglýstur en nýi staðurinn verður opnaður í Ingólfsstræti 2.
Uppfært 16. október 2014 kl. 13:56:
Samkvæmt nýjustu upplýsingum standa enn yfir framkvæmdir á staðnum og því mögulegt að opnunin seinki. Við hjá Nörd Norðursins munum fylgjast með gangi mála og láta vita þegar nýjar fréttir berast.
Mynd: Mortal Kombat
Höfundur er Bjarki Þór Jónsson,
leikjanörd og ritstjóri Nörd Norðursins.