Skemmtilega vildi til að þessi tölvuleikjaspilari fékk boð um að taka þátt í lokaðari Beta prufu fyrir FIFA 14. Þar sem fleiri er líklega jafn spenntir, ef ekki spenntari, fyrir þessum leik þá er upplagt að sýna smá frá leiknum og tala aðeins um breytingar sem hafa verið gerðar, athuga skal að þetta er alls ekki gagnrýni, heldur aðeins fyrstu viðbrögð við leiknum.
Útlit hefur verið tekið í gegn og er töluvert stílhreinna en í fyrri leikjum. Nú er bæði hægt að senda út njósnara og búa til þitt eigið njósnanet (e. Global Transfer Network). Þannig geta spilarar hannað sitt eigið net, safnað upplýsingum um leikmenn og fundið þann sem hentar best fyrir liðið. Með þessu þá er verið að færa sig frá þeirri hugmynd að leikmaður hafi eina einkunn sem segir til um getu hans. Þess í stað þá gefur njósnari upp hversu góður leikmaðurinn er og leggur dóm á leikmanninn.
Helsti munurinn frá síðasta leik eru sendingarnar, það er töluvert auðveldara að senda nákvæmar sendingar og ekki er verra að gervigreind leikmanna er orðin töluvert betri. Bæði með að samherjar eru að búa til hlaup til að skapa færi og andstæðingurinn oft fljótur að átta sig á hvað er í gangi. Það er skrítið að segja þetta, en boltinn er allt öðruvísi en í fyrri leikjum. Samkvæmt EA þá hafa þeir endurhugsað eðlisfræðina á bakvið boltann. Kannski er þetta ímyndun en þessi spilari finnur svo sannarlega fyrir þessari breytingu. Einnig hreyfa leikmenn sig mun betur. Fyndið að skipta yfir í FIFA 13 því leikmennirnir virka pínu klunnalegir í samanburði við leikmennina í FIFA 14.
Leikurinn spilast alveg ótrúlega vel og það verður gaman að fá að prufa leikinn með Ignite vélinni frá EA. Það verður gaman að sjá hvernig leikurinn mun líta út á Ps4, Xbox One og Wii U. Allt bendir til þess að við séum að fá góða viðbót við FIFA seríuna.
Höfundur er Helgi Freyr Hafþórsson,
fastur penni á Nörd Norðursins og nemi í fjölmiðlafræði.