Superman í 75 ár
Það hefur vonandi ekki farið framhjá neinum að nýjasta Superman myndin, Man of Steel, verður tekin til sýninga hér á landi þann 21. júní næstkomandi. Sagan um Superman hefur alla tíð hreyft við lesendum og áhorfendum. Enda kannski ekki skrýtið því svona sögur hafa fylgt mannskepnunni frá því að Gilgameskviða var rituð á stein í kringum 1300 – 650 f.Kr. og er ein fyrsta hetjusagan sem fundist hefur, fjallar um hálfguðinn og ofurmennsku hetjuna Gilgames. Hljómar kunnuglega ekki satt.
Leikstjóri Man of Steel, Zack Snyder, fer heldur óhefðbundnar leiðir að gerð myndarinnar og kemur í raun á óvart því þessi hæfileikaríki leikstjóri hefur gert tölvubrellukvissbangbúmmhlaðnar myndir eins og 300 (2006) og Sucker Punch (2011). Við gerð Man of Steel notaði hann nánast eingöngu eina tökuvél sem er nánast óþekkt í svona stórri framleiðslu í dag og myndin er tekin á filmu (þetta kallar maður að fara „back to basics“). Þegar horft er á stikluna fyrir myndina sést strax hvað rammarnir eru með fallegri áferð. Áferðin á filmunni gefur svo mikið sem stafræna tæknin kemst ekki nálægt. Svo sér maður hver einn af aðalframleiðendunum er og þá áttar maður sig á hvaðan þessi sérstaka vinnuaðferð kemur, en Christopher Nolan er einn framleiðandinn og líklega stóri áhrifavaldur Snyder.
Það eru liðin 75 ár síðan Superman lenti fyrst með miklum krafti á blaðsíðum myndasögubálksins Action Comics, nr. 1, 18. apríl 1938 og varð þar með ein fyrsta ofurhetjan sem birtist í myndasögu og er talið að gullöld myndasögunnar hafi byrjað með þessari útgáfu. Action Comics varð síðan að DC comics, sem eflaust margir kannast við. Superman hefur síðan birst í sjónvarpsþáttum og kvikmyndum í gegnum tíðina en útlit hans hefur breyst mikið og verður nú litið yfir sögu og þróun Superman, aðallega hvernig níþröngi og mjög svo þægilegi búningurinn hefur þróast, því það hafa allir mestan áhuga á því – er það ekki annars?
1938
Action Comics nr. 1 kemur út. Superman kynntur til sögunnar, uppruni hans og hæfileikar.
Fjórði áratugurinn
Það leið ekki á löngu þangað til Superman fékk sína eigin myndasögu enda varð persónan gríðarlega vinsæl.
1948
Vinsældir Superman jukust jafnt og þétt og birtust sögur um hann í dagblöðum, útvarpi og teiknimyndum. Árið 1948 voru sýndar stuttar kvikmyndaseríur í kvikmyndahúsum, undanfari sjónvarpsþátta. Fyrsti leikarinn til að fara í búninginn hét Kirk Alyn.
1952
Sjónvarpið er nýkomið til sögunnar og þættirnir The Adventures of Superman hefja göngu sína eru sýndir frá 1952 til 1958. Aðalleikari þeirra þátta hét George Reeves og urðu þættirnir gríðarlega vinsælir.
Sjötti áratugurinn
Þó svo að Superman væri vinsæll á sjónvarpsskjánum hélt hann áfram að birtast í myndasögum og voru þær ekkert minna vinsælli. Ímynd hans mótaðist á þessum tíma, merkið tók á sig nánast endanlega mynd og vöðvarnir komu betur í ljós.
1966
Söngleikurinn um Superman, It’s a Bird…It’s a plane…It’s Superman, er frumsýndur á Broadway en varð ekki langlífur. Kemur á óvart!
1973
Teiknimyndaþættirnir Super Friends, þar sem Superman kemur við sögu eru sýndir í sjónvarpi og voru langlífir, sýndir á árunum 1973 til 1986.
1978
Christopher Reeve fer í þrönga búninginn og goðsögn verður til. Marlon Brando leikur föður hans, Jor-El. Gene Hackman er vondi karlinn, Lex Luthor og kvikmyndamógularnir í Hollywood áttu eftir að átta sig á því að ofurhetjur í kvikmyndum eru peningamaskína.
Níundi áratugurinn
Um miðjan níunda áratuginn höfðu meira en 400 tölublöð komið út um Superman.
1993
Sjónvarpsþættirnir Lois & Clark: The New Adventures of Superman eru frumsýndir. Hin misgóði Dean Cain treður sér í búninginn og Teri Hatcher verður stjarna sem Lois Lane.
1996
Nýjar teiknimyndir um Superman litu dagsins ljós og komu í kjölfar vinsælda teiknimyndaþátta um Batman. Voru sýndir til ársins 2000.
2001
Þar sem vinsældir unglingaþátta jukust jafnt og þétt komu fram í dagsljósið þættirnir Smallville um unglinginn Superman, ástir og örlög – þið þekkið þetta kjaftæði. Tom Welling lék Superman og stelpurnar lágu andvaka. Þættirnir voru sýndir til ársins 2011.
2006
Kvikmyndin Superman Returns kemur út. Búningurinn er ekki í takt við nútímann og framleiðendur ekki nógu kaldir. Myndin gekk ekki vel í kvikmyndahúsum og fékk dræmar viðtökur gagnrýnenda.
2011
Myndasögurnar um Superman hafa tekið miklum breytingum í gegnum tíðina og er ofurhetjan nú orðin mun brothættari sem persóna. Meiri drungi og noir einkenni svífa yfir vötnum í þessum nýjum sögum.
2013
Það er beðið með mikilli eftirvæntingu eftir Man of Steel og ef eitthvað er að marka kynningarefnið sem komið hefur út síðustu mánuði þá er von á feitum bita frá vænum sauð! Myndin er frumsýnd 21. júní hér á landi.
Höfundur er Ragnar Trausti Ragnarsson,
fastur penni á Nörd Norðursins og nemi í kvikmyndafræði við Háskóla Íslands.
Þú hefur kannski áhuga á þessu...
Leikjarýni: Spider-Man – Einn af betri leikjum ársins →
Leikjarýni: Lego Marvel Super Heroes 2 →
Leikjarýni: Injustice 2 – einn af betri bardagaleikjum ársins →
