Hver kannast ekki við að spila leik sem virðist vera ansi óspennandi – nema keyptir séu nokkrir aukapakkar sem kosta svipaða upphæð og leikurinn sjálfur? Þessu kynntist ég persónulega í Mafía 2, þar sem mér þótti leikurinn aaaalltof stuttur en gat keypt mér aukapakka um leið og ég var búinn með leikinn. Sem ég gerði ekki, það var búið að svindla nóg á mér!
Í dag er fjöldi leikja sem byggir mikið upp á DLC efni. DLC stendur fyrir downloadable content, eða niðurhalanlegt efni, sem er aukaefni fyrir leikinn sem spilarinn þarf í lang flestum tilfellum að borga fyrir. Í DLC Quest er gengið ALLA leið, þar sem ALLT snýst um aukapakkana!
Saga leiksins hljómar kunnuglega; spilarinn stjórnar söguhetju leiksins sem er á höttunum eftir vonda gaurnum sem stal prinsessunni. Stutt og einfalt. Í byrjun leiksins getur spilarinn eingöngu fært söguhetjuna til hægri, en það þarf að kaupa aukapakka til þess að geta hreyft söguhetjuna í allar áttir. Einnig eru til aukapakkar sem gefa leiknum hljóð, gera spilaranum kleyft að ýta á pásu í leiknum og annar sem gefur hetjunni pípuhatt. Í rauninni til að komast áfram í leiknum (og um leið hafa gaman af honum) ÞARF spilarinn að kaupa aukapakkana.
Sem betur fer er allt aukaefnið (DLC) ókeypis og fylgir leiknum, en til þess að kaupa aukaefnið verður spilarinn að safna gullpeningum sem hann notar til að borga fyrir aukaefnið.
Það tekur aðeins 20 til 40 mínútur að klára leikinn og gera allt sem hægt er að gera í honum. Grafík og hljóð leiksins eru í anda pixlaðra heima frá tíma 8 og 16 bita leikjavélanna og er sérstaklega vel heppnað. Húmorinn í leiknum er líka alveg æðislegur og spilar stórann þátt.
DLC Quest er fáanlegur á indí-markaði Xbox 360 og kostar 80 MS punkta, eða rétt yfir 100 kr.
Í stuttu máli
Leikurinn er mjög stuttur en um leið mjög ódýr. Leikurinn er fyndinn og fallegur og að lokinni spilun þyrstir spilarann í fleiri aukapakka (sem eru því miður ekki í boði… enn sem komið er)!
9,0
– Bjarki Þór Jónsson