Nú þegar dagarnir styttast og nístingskuldi heltekur landið þá verða samverustundirnar inni í hlýjunni enn dýrmætari. Ég fer alltaf að leita af skemmtilegum sófasamvinnuleikjum (e. couch co-op) þegar líður að jólum til að spila með mínu nánasta fólki. Það er eitthvað við að spila tölvuleiki saman hlið við hlið sem gerir upplifunina svo skemmtilega og maður nær að tengjast fólkinu sínu mun betur en að spila saman á netinu.
Við hjá Nörd Norðursins höfum tekið saman lista yfir frábæra co-op leiki sem henta fullkomlega fyrir veturinn! Hvort sem þú ert að skipuleggja fjölskyldukvöld, vinahitting eða notalega kvöldstund með ástinni, þá vonum við að þú finnir leik sem vekur upp hlýjar og skemmtilegar stundir með þínum nánustu.
Fjölskylduleikir
Leikir sem gaman er að spila með fjölskyldu eða vinum.
1. Overcooked! All You Can Eat
| Tegund | Hermileikur / Partýleikur |
| Fjöldi spilara | 2–4 |
| Aldurstakmark | PEGI 3 |
| Leikjavélar | PC, PS4, PS5, Xbox One, Xbox Series X|S, Nintendo Switch |
| Útgáfuár | 2020 |
Í þessum eldhúskaosleik þurfa spilarar að vinna saman til að matreiða, þrífa og þjóna mat á hraðferð. Fullkomið fyrir fjölskyldur sem vilja hlæja saman og æpa yfir því að „einhver gleymdi lauknum!“.
2. Lego Star Wars: The Skywalker Saga
| Tegund | Ævintýra-/þrautaleikur |
| Fjöldi spilara | 2 |
| Aldurstakmark | PEGI 7 |
| Leikjavélar | PC, PS4, PS5, Xbox One, Xbox Series X|S, Nintendo Switch |
| Útgáfuár | 2022 |
Með léttu gríni, einföldum þrautum og litríkum Lego-heimi er þessi leikur fullkominn fyrir Star Wars-aðdáendur og fjölskyldur sem vilja njóta samverustunda í tölvuleikjum. Lego-leikirnir bjóða upp á ómótstæðilega blöndu af húmor og skemmtun, og í raun má segja að þeir séu ávallt öruggur valkostur fyrir frábæra fjölskyldustund. Veljið þann Lego-heim sem heillar ykkur mest, hvort sem það er Star Wars, Harry Potter eða jafnvel Jurassic World – og látið leikgleðina flæða!
3. Don’t Starve Together
| Tegund | Survival / Sandkassi |
| Fjöldi spilara | 2–4 |
| Aldurstakmark | PEGI 12 |
| Leikjavélar | PC, PS4, Xbox One, Nintendo Switch |
| Útgáfuár | 2016 |
Lifðu af í dularfullum heimi þar sem skrímsli og hungur ógna tilveru ykkar. Leikurinn reynir á sköpunargáfu og samvinnu.
4. Mario Kart 8 Deluxe
| Tegund | Kappakstursleikur |
| Fjöldi spilara | 2–4 |
| Aldurstakmark | PEGI 3 |
| Leikjavélar | Nintendo Switch |
| Útgáfuár | 2017 |
Keppið á litríkum brautum, notið galdraskeljar og skemmtið ykkur konunglega í þessum sígilda kappakstursleik. Þó að hann sé í grunninn andstæða samvinnuleiks fær keppnisskapið svo sannarlega að blómstra hér! Leikurinn er frábær fyrir alla aldurshópa, þar á meðal yngstu spilarana, þar sem hægt er að stilla erfiðleikastig fyrir hvern leikmann og gera leikinn aðgengilegan fyrir alla.
Auk þess er til viðbótarpakki með fleiri skemmtilegum brautum sem lengja leikgleðina enn frekar!
5. Minecraft
| Tegund | Sandkassaleikur / Ævintýri |
| Fjöldi spilara | 2–4 |
| Aldurstakmark | PEGI 7 |
| Leikjavélar | PC, PS4, PS5, Xbox One, Xbox Series X|S, Nintendo Switch |
| Útgáfuár | 2011 |
Það er ekki hægt að sleppa að nefna þennan klassíska sandkassaleik þar sem hann er fullkominn fyrir fjölskyldur til að spila saman, hann er alveg jafn skemmtilegur fyrir alla aldurshópa. Byggið saman, berjist við óvini eða kannið endalausan heim í Minecraft.
6. Rayman Legends
| Tegund | Platformer |
| Fjöldi spilara | 2–4 |
| Aldurstakmark | PEGI 7 |
| Leikjavélar | PC, PS4, PS5, Xbox One, Xbox Series X|S, Nintendo Switch |
| Útgáfuár | 2013 |
Litríkur og glaðlegur platformer-leikur með grípandi tónlist og fjölbreyttum borðum sem gleðja alla fjölskylduna.
7. Sackboy: A Big Adventure
| Tegund | Platformer / Ævintýri |
| Fjöldi spilara | 2–4 |
| Aldurstakmark | PEGI 7 |
| Leikjavélar | PS4, PS5, PC |
| Útgáfuár | 2020 |
Skemmtilegur leikur sem hentar vel fyrir bæði börn og fullorðna, þar sem þú og vinir þínir leysið þrautir í litríkum heimi.
8. Mario Party
| Tegund | Partýleikur / Minileikir |
| Fjöldi spilara | 2–4 |
| Aldurstakmark | PEGI 3 |
| Leikjavélar | Nintendo Switch |
| Útgáfuár | 2021 |
Fullkomnir leikir fyrir fjölskyldukvöld. Keppið í minileikjum og náið á toppinn á spilaborðinu. Nýlega kom út leikurinn Mario Party Jamboree sem lofar rosalega góðu. Super Mario Party, Mario Party Superstars og Mario Party Jamboree eru allt Mario Party leikir sem hægt er að nálgast á Switch. Leikurinn líkist rafrænu borðspili, þar sem maður ferðast áfram á teningaköstum og er stútfullt af litlum leikjum fyrir fólk á öllum aldri.
9. Boomerang Fu
| Tegund | Partýleikur / Hasar |
| Fjöldi spilara | 2–6 |
| Aldurstakmark | PEGI 7 |
| Leikjavélar | PC, PS4, PS5, Xbox One, Xbox Series X|S, Nintendo Switch |
| Útgáfuár | 2020 |
Þessi skemmtilegi hasarleikur býður upp á einfaldar, en ótrúlega spennandi bardagaviðureignir þar sem matarfígúrur skjóta og skera hver aðra með búmeröngum. Fullkominn leikur fyrir vinahópa og fjölskyldur sem elska hraða og húmor. Hægt er að breyta stillingum og leikreglum til að skapa fjölbreytt og nýja upplifun í hverri lotu.
10. Gang Beasts
| Tegund | Partýleikur / Minileikir |
| Fjöldi spilara | 2–4 |
| Aldurstakmark | PEGI 3 |
| Leikjavélar | Nintendo Switch |
| Útgáfuár | 2021 |
Gang Beasts er sprenghlægilegur bardagaleikur þar sem skrítnar gelkallalíkar fígúrur slást á hættulegum leiksvæðum. Leikurinn er auðvelt að læra en erfitt að verða góður í og hentar sérstaklega vel fyrir fjölskyldur og vinahópa sem vilja mikið hlátraskall og smá keppnisskap.
Er kominn tími fyrir date night?
1. It Takes Two
| Tegund | Ævintýri / Þrautaleikur |
| Fjöldi spilara | 2 |
| Aldurstakmark | PEGI 12 |
| Leikjavélar | PC, PS4, PS5, Xbox One, Xbox Series X|S, Nintendo Switch |
| Útgáfuár | 2021 |
Leikurinn fylgir sögu hjóna sem eru að takast á við erfiðleika í sambandinu sínu en breytast óvænt í leikföng. Þið þurfið að vinna saman til að komast áfram í litríkum og skapandi heimi fullum af þrautum. It takes two var valinn leikur ársins 2021 af lesendum Nörd Norðurssins (sjá hér).
2. Unravel Two
| Tegund | Platformer / Þrautaleikur |
| Fjöldi spilara | 2 |
| Aldurstakmark | PEGI 7 |
| Leikjavélar | PC, PS4, Xbox One, Nintendo Switch |
| Útgáfuár | 2018 |
Tveir litlir garnkarlar ferðast saman í heimi sem er bæði fallegur og krefjandi. Leikurinn er rólegur og kallar á góða samvinnu.
3. Cuphead
| Tegund | Skotleikur / Platformer |
| Fjöldi spilara | 2 |
| Aldurstakmark | PEGI 7 |
| Leikjavélar | PC, PS4, Xbox One, Nintendo Switch |
| Útgáfuár | 2017 |
Leikurinn er innblásinn af teiknimyndum frá 20. öld og sameinar mjög krefjandi spilun og frábærann gamaldags listastíl. Þessi leikur er frábær fyrir pör sem vilja erfiðari leikjaupplifun og fá að svitna smá saman!
4. A Way Out
| Tegund | Ævintýri / Þrautaleikur |
| Fjöldi spilara | 2 |
| Aldurstakmark | PEGI 18 |
| Leikjavélar | PC, PC, PS4, Xbox One |
| Útgáfuár | 2018 |
Þessi einstaki leikur krefst þess að það séu tveir spilarar og fylgir sögu tveggja fanga sem reyna að flýja úr fangelsi. Hann býður upp á grípandi sögu og er heldur einfaldur í spilun svo hann hentar þeim sem eru ekki vanir tölvuleikjaspilarar. Leikurinn er frá sömu framleiðundum og sem gerðu verðlaunaleikinn It takes two.
5. Knights and Bikes
| Tegund | Ævintýri / Þrautaleikur |
| Fjöldi spilara | 2 |
| Aldurstakmark | PEGI 7 |
| Leikjavélar | PC, PS4, Nintendo Switch |
| Útgáfuár | 2019 |
Þessi heillandi indie leikur fylgir tveimur börnum á hjólum sem kanna dularfulla eyju. Hann er líflegur, litríkur og fullkominn fyrir pör sem vilja eitthvað létt og hjartnæmt.
6. Haven
| Tegund | Ævintýri / RPG |
| Fjöldi spilara | 2 |
| Aldurstakmark | PEGI 12 |
| Leikjavélar | PC, PS4, PS5, Xbox One, Xbox Series X|S, Nintendo Switch |
| Útgáfuár | 2020 |
Leikurinn fylgir ástfangnu pari sem hefur flúið plánetuna sína til að byrja nýtt líf saman. Hann er afslappandi og býður upp á fallega rómantíska sögu með einföldu spilunarkerfi.
7. Pode
| Tegund | Þrautaleikur |
| Fjöldi spilara | 2 |
| Aldurstakmark | PEGI 3 |
| Leikjavélar | PC, PS4, Nintendo Switch |
| Útgáfuár | 2018 |
Þessi norski leikur byggir á samvinnu tveggja persóna sem kanna helli og leysa þrautir saman. Leikurinn er fallegur, rólegur og krefst góðrar samskiptafærni.
8. Borderlands 2
| Tegund | Skotleikur / Hlutverkaleikur |
| Fjöldi spilara | 2 |
| Aldurstakmark | PEGI 18 |
| Leikjavélar | PC, PS4, PS5, Xbox One, Xbox Series X|S, Nintendo Switch |
| Útgáfuár | 2012 |
Ef þið viljið hasar, húmor og epísk ævintýri, þá er Borderlands 2 fullkominn leikur fyrir ykkur. Leikurinn er þekktur fyrir skemmtilega persónusköpun, endalausa fjölda vopna og ótrúlega kímnigáfu. Þið getið sameinað krafta ykkar til að berjast gegn óvini, kannað stóran opinn heim og leyst ýmis skemmtileg verkefni. Hann hentar vel fyrir vinahópa og pör sem eru til í adrenalínspennu og óhefðbundinn húmor. Borderlands 3 kom einnig út árið 2019 og er líka skemmtilegur ef þið eruð búin með 2 og viljið meira!
Þetta er aðeins brot af þeim fjölmörgu sniðugu samvinnuleikjum sem hægt er að spila í vetur. Auk þess eru til margir vinsælir leikir með co-op möguleika, eins og til dæmis Stardew Valley, sem hefur heillað spilara með afslöppuðu tempói og sjarma, og margir af klassísku Nintendo leikjunum, þar á meðal Kirby and the Forgotten Land og Super Mario Bros. Wonder.
Portal 2 stendur þó alltaf upp úr hjá mér þegar kemur að samvinnuleikjum. Þrátt fyrir aldur er hann enn ótrúlega skemmtilegur og ég vona að hann verði endurgerður fyrir PS5 einn daginn. Fyrir þá sem eru með PC og split-screen uppsetningu er hann fullkominn fyrir næsta date night – klassík sem klikkar ekki.
Hvort sem þú ert að leita að léttum og fyndnum leik eða einhverju meira krefjandi, þá er eitthvað á þessum lista sem hentar. Náðu í stýripinnana, skelltu þér á sófann og láttu gleðina taka yfir!
Ef þú hefur spilað einhverja af þessum leikjum, eða ef þú hefur fleiri tillögur, endilega deildu með okkur í athugasemdunum! Við elskum að heyra frá öðrum leikjaspilurum. Góða skemmtun og njótið samverunnar! 🎮✨