Hin árlega E3 leikjasýning hófst fyrr í dag í Los Angeles í Bandaríkjunum. Á blaðamannafundi EA kynnti leikjafyrirtækið það helsta sem má vænta frá fyrirtækinu á komandi mánuðum, allt frá Star Wars Battlefront yfir í FIFA 15.

Star Wars Battlefront

Því miður fengum við lítið að sjá úr sjálfum leiknum en þessi kítla gefur smjörþefinn af því sem koma skal. Leikurinn er væntanlegur vorið 2015, en sama ár mun Star Wars: Episode VII í leikstjórn J.J. Abrams líta dagsins ljós.

Dragon Age: Inquisition

Myndbandið hér fyrir neðan sýnir fjórmenninga berjast við dreka og um leið hvernig bardagakerfi leiksins virkar. Dragon Age: Inquisition er væntanlegur í verslanir 7. október á þessu ári og verður fáanlegur á PC, PS3, PS4, Xbox 360 og Xbox One.

Mass Effect 4

Lítið sem ekkert var sagt um leikinn nema að spilarar mega búast við nýjum heimum og nýjum karakterum. BioWare, leikjafyrirtækið sem stendur á bak við Mass Effect leikina, er auk þess að þróa nýjan leik sem gerist í stórum opnum og raunverulegum heimi sem stöðugar breytingar eiga sér stað í.

Sims 4

Í Sims 4 verður hægt að breyta sims-unum sínum meira en áður. Á kynningunni var okkur gefin dæmisaga úr Sims 4 heiminum, og undirbúið ykkur núna undir stórfurðulega sögu: Við fylgjumst með Chuck, íþróttamanni á þrítugsaldri sem elskar bókmenntir. Hann fer með ljóð fyrir eldri konu sem mislíkar ljóðið svo að hún á erfitt með að hemja sig og ákveður að berja greyið strákinn. Til að lyfta sér upp eftir atvikið ákveður Chuck að halda partý, en viti menn, þangað mætir gamla konan sem virðist vera algjör partýprumpari. Strax þar á eftir mætir stuðbolti í partýið sem fær Chuck til að hlæja svo mikið — að hann deyr. Og þannig endar dæmisagan, huggulegt ekki satt? Sims er væntanlegur í verslanir 2. september 2014.

Mirror’s Edge

Lítið af spennandi fréttum og í raun bara stutt áminning um það að enn er verið að vinna að gerð leiksins. Mirror’s Edge byggir mikið á hreyfingum og sækir meðal annars innblástur frá parkour listinni. Faith, aðalsöguhetja leiksins, er á mikilli hreyfingu í leiknum og mun spilarinn geta valið á milli margra mismunandi leiða og á milli tveggja staða í opnum leikjaheimi.

Dawngate

Dawngate er fjölspilunar- bardagaleikur (MOBA) sem verður ókeypis að spila. Leikurinn fór í opna betu fyrr á þessu ári.

Íþróttaleikir

EA Games kynnti nýjasta UFC bardagaleikinn á blaðamannafundi fyrir skemmstu. Þar kom meðal annars fram að í leiknum fá spilarar möguleika á að spila sem goðsögnin Bruce Lee. Þetta eru ekki nýjar fréttir og hafa sumir efast um að andi goðsagnarinnar eigi heima í jafn grófum bardagaheimi og UFC er. Sama hvaða skoðun menn hafa á því verður áhugavert að sjá hvernig Gunnar Nelson mun standa sig á móti sjálfum Bruce Lee, en Dana White, forseti UFC, staðfesti á dögunum að Gunnar Nelson verður ekki í upprunalegu útgáfu leiksins en hægt verður að hala honum niður sem viðbót.

Einnig voru nýir leikir í NHL, PGA Tour, Madden, og FIFA seríunum kynntir til leiks. Í leikjunum má búast við uppfærslum sem betrumbæta leikina og gera þá nákvæmari og raunverulegri. Við erum þó varla að tala um einhverja byltingu hér, heldur frekar minni hluti eins og að fínstillingar á myndvélum og hreyfingar á hornstöngum þegar boltinn rekst í hana í FIFA 15. Í þessum flokki ber sérstaklega að nefna golfleikinn PGA Tour 15, en í honum verður heldur betur hrist upp í hlutunum og reynt að gera golfið meira spennandi -meðal annars með því að bæta við risavöxnum orrustuskipum!

Battlefield: Hardline

Battlefield: Hardline stal kastljósinu algjörlega og var hápunktur kynningarinnar. Í leiknum er „löggu og bófa“  lyft upp á næsta þrep. Í myndbandinu hér fyrir neðan er sýnt úr fjölspilunarhluta leiksins þar sem þeir góðu (löggurnar) eltast við þá slæmu (bófarnir) í hörkuspennandi hasarleik. Á E3 var tilkynnt í beinni útsendingu að beta útgáfa leiksins væri strax aðgengileg þar sem fyrstur kemur fyrstur fær. Battlefield: Hardline kemur í verslanir 21. október 2014.

Höfundur er Bjarki Þór Jónsson,
leikjanörd og ritstjóri Nörd Norðursins.