Nioh 3 – „Gott verður betra“

Nioh 3 náði nýlega þeim áfanga að hafa selst í yfir milljón eintökum og Nioh leikirnir sem heild yfir 10 milljón eintak en Nioh 3 er sá sem hefur verið að seljast sem hraðast í seríunni.

Fyrir þá sem ekki þekkja þá eru Nioh leikirnir hasar-RPG-leikir með mikið af „loot“ þar sem maður er nánast stanslaust að berjast við heri af yfirnáttúrulegum verum af ýmsum stærðum og gerðum sem sækja uppruna sinn í japanska goðafræði. Hægt er að nota ýmsa bardagastíla og marg konar vopn. Sagan hefur alltaf verið aukaatriði í þessum leikjum en fyrir þá sem vilja kafa í hana þá á hún sér tilvísun í japanska sögu. Reyndar finnst mér sagan síst af öllum þremur leikjunum hérna en það þýðir ekki að þetta sé versti leikurinn.

Líklega hefur aldrei verið eins auðvelt að komast inn í Nioh leik og núna því að maður gat rekist á vegg með hina tvo og sumt var ekki alveg eins slípað og það mætti vera í spilun, sérstaklega fyrir þann fyrsta. Erfiðleikastigið er mun viðráðanlegra fyrir nýja spilara en áður. Heimurinn er líka mun opnaðri og hérna hefur maður þokkalega stórt opið svæði til að leika sér í og flækjast um til að safna hlutum og fleira en samt ekkert á við aðra stórleiki enda er það ekki aðaltilgangur leiksins.

Stór breyting í Nioh 3 er að með einum takkasmelli getur maður breytt sér frá Ninja í Samurai og til baka. Ninja sérhæfir sig í að skjóta meira (s.s. shuriken stjörnum eða gildrum) og nota „ninjagaldra“ eins og reyksprengjur, lömunar-karatestjörnur og síðasta en ekki síst breyta sér í stóran kringlóttan kött sem rúllar sér um. Einnig ertu sneggri sem Ninja og með meira þol (stamina). Þolið hefur mikið að segja í Nioh leikjunum og þarf maður vel að passa að missa ekki andann því þá opnast gott tækifæri fyrir óvinina. Leikurinn hvetur þig til að skipta oft á milli því að ein leið til að “parry” óvinina er að skipta um leið.

Samurai gerir líklega meira skaða með sínum stöðum (stances) og þá stjórnar maður hvort maður gerir þung og hæg högg, hraðari högg eða mitt á milli. Þetta er staðlaða Nioh týpan sem maður þekkir frá hinum leikjunum. Þú ert að safna saman klæðnaði (gear) fyrir báðar týpurnar sem er ágætt því að fjöldi þess sem maður er að fá er óbreyttur þ.e.a.s. nóg til að fylla nokkra vörubíla. Nioh 3 here samt bætt úr úrvinnslu hluta, núna geturðu haldið á feykimörgum hlutum áður en þú þarft að farga einhverju til að fá efni fyrir járnsmiðinn eða selt.

Það eru alls konar aukaleiðir sem hægt er að nota í bardaga eins og að kalla upp verur til að berjast fyrir þig í smátíma, breyta sér sjálfum í guardian (hálfgerð gæludýr sem elta þig og gefa þér ýmsa eiginleika), nota ýmsa galdra og vopn, byssur og boga og svo mætti áfram telja. Að ónefndu öllum þeim bardagahreyfingum sem maður hefur heilu hæfileikatrén til að byggja upp. Það er hætta á að allir þessi möguleikar fæli byrjendur frá en ef maður gefur sér tíma þá finnur maður leið sem hentar manni.

Varðandi erfiðleikastigið þá mæli ég með að spila söguna með öðrum ef þú hefur færi á. Hann er það hraður og skemmtilegur að hann passar vel sem co-op leikur og hann er einstaklega vel hannaður að því leyti. Ég spilaði allan leikinn með öðrum og lenti aldrei í vandræðum. Þetta er einnig leið til að gera leikinn auðveldari því að maður hefur fleiri líf í co-op því að vinur þinn getur lífgað þig við nokkrum sinnum sem er ekki möguleiki þegar maður spilar einn. Reyndar fá óvinir aðeins meira líf þegar maður spilar co-op en það breytir nánast engu. Leikurinn getur verið smá erfiður í einstaka stórbardögum en þú getur fengið smá hjálp frá bardagahetjum sem leikurinn stjórnar þó að sú hjálp sé ekki það mikil eins og er. Það er alltaf hægt að detta aftur á að maður getur breytt strategíu, vopn, hjálpardýr og svo mætti áfram telja.

Nioh leikirnir eru einir af þessum leikjum sem hægt er að spila áfram eftir að maður hefur klárað hann. Það bætast við erfiðari leikjastillingar og ýmsar áskoranir ásamt því að hlutirnir sem maður notar verða alltaf betri og betri („loot“ skiptist í venjulegt, sjaldgæft, epísk o.s.frv.). Team Ninja eiga eftir að halda áfram að vinna með leikinn og búa til aukasögu og einhvers konar “gauntlet” sem maður getur spilað aftur og aftur og unnið sig upp sb. Diablo leikir og fleira.

Leikurinn sjálfur er skemmtilegur, það er margt sem þeir eru búnir að slípa og gera betur en í Nioh 2 en formúlan er nánast sú sama. Ég kláraði leikinn en fékk ekki sama spenning að halda áfram í New Game plus eins og í Nioh 2 því að margt minnti bara of mikið á Nioh 2 og mér fannst dáldið eins og ég væri að fara gera sama hlutinn aftur því að ég eyddi mörgum tugum tímum í meta-leik Nioh 2. Bardagastílarnir, skrímslin, umhverfið, góðu verurnar, hvernig maður byggir sig upp, hvaða hluti maður er að fá og svo mætti lenga telja er nánast allt eins og í Nioh 2 og Nioh 1 bara í fallegri búningi.

Þannig að þetta er góður leikur fyrir þá sem vilja prófa seríuna en fyrir vana spilara þá er möguleikinn á að maður gefist upp fyrr en maður ætlar sér því að margt er óbreytt. En ef þú elskar formúluna þá ertu kannski sáttur við að taka annað áhlaup á „meta“ leikinn og hvernig hann er öðru vísi núna. En staðreyndin er að þetta er vel gerður leikur sem svíkur ekki. Ég spilaði hann á PS5 venjulegri og lenti ekki í FPS vandræðum. Vonandi hristir Ninja Theory aðeins meira upp í hlutunum þegar Nioh 4 kemur en miðað við sölutölur þá er formúlan ennþá að virka.