Indiana Jones and the Great Circle: Enn betri á PlayStation 5 og PS5 Pro

Í desember í fyrra leikurinn Indiana Jones and the Great Circle kom út á PC og Xbox Series og fékk fína dóma með um 86 af 100 á Metacritic vefnum. Við tókum fyrir PC útgáfu leiksins hérna á Nörd Norðursins og gáfum honum 4 af 5 mögulegum í einkunn.

“Það var ljóst að The Great Circle var gerður af fólki sem hefur séð myndirnar um Indiana Jones örugglega svipað oft og ég í gegnum árin. Ást þeirra á viðfangsefninu var mjög sjáanleg í gegnum spilun mína á leiknum og margir skemmtilegir nostalgíu-partar í leiknum fyrir þá sem hafa haft gaman af myndunum í gegnum árin. Þeir sem hafa ekki mikinn áhuga á þessum kvikmyndum fá líklega minna úr leiknum en þeir sem þekkja vel til ævintýra Indys.”

PlayStation eigendur þurftu að bíða eftir leiknum og kom hann loksins út fyrir PS5 og PS5 Pro þann 17. apríl síðastliðinn.

Leikurinn hefur verið uppfærður til að nýta þá möguleika sem PS5 og PS5 Pro leikjavélarnar bjóða upp á eins og DualSense stuðningur með aðlögunartækni og betri hristitækni.

PlayStation 5 Pro uppfærslur leiksins gera hann enn betri en áður og að mínu mati einn af betri PS5 Pro leikjum hingað til. Leikurinn keyrir enn betur og með jafnari rammahraða (fps), það er betri stuðningur með Ray-tracing tæknina og upplausnin er hærri.

Ef leikurinn er spilaður á venjulegri PS5 eða Xbox Series þá er fólk ekkert að missa of miklu samt. Þetta er enn sami góði leikurinn og kom út í fyrra bara slípaðri og betrumbættri.

Ég sökkti ófáum tímum í PC og Xbox Series útgáfur leiksins í fyrra og er búinn að hafa gaman að renna í gegnum hann aftur nú á PS5. Það er auðvelt að mæla með þessum leik fyrir þá sem hafa gaman að góðum ævintýraleikjum, og ekki verra er ef þið hafið haft gaman af kvikmynda seríunni sem George Lucas og Steven Spielberg gerðu saman.

Machine Games komu skemmtilega á óvart með nýju ævintýri um Indiana Jones en þeir höfðu hingað til verið þekktastir fyrir endurvakningu Wolfenstein-seríu Id Software og Bethesda Games sem hittu vel í mark.

Leikurinn tekur um 125 GB pláss á SSD drifi PS5 eða PS5 Pro sem er eitthvað sem fylgir straumnum í leikjabransanum í dag þar sem stærðir á tölvuleikjum hafa vaxið gríðarlega síðustu árin.

PlayStation eigendur eiga von á góðu ævintýri í stíl Indiana Jones and the Great Circle og mæli ég með að skoða gagnrýni leiksins á Nörd Norðursins fyrir þá sem vilja kynna sér meira og hafið engar áhyggjur, það eru engir spillar í textanum.

Eintak í boði útgefanda.