Tölvuleikurinn Aaru’s Awakening frá íslenska leikjafyrirtækinu Lumenox Games er væntanlegur á Steam leikjaverslunina 24. febrúar næstkomandi. Leikurinn mun virka á Windows, Mac og Linux. Leikurinn verður á 15% afslætti fyrstu vikuna á Steam. Þetta kemur fram í fréttatilkynningu frá fyrirtækinu.

Aaru’s Awakening er hraðskreiður 2D hasar- og þrautaleikur í handgerðum liststíl sem hefur verið í þróun síðan 2012. Upphaflega stóð til að leikurinn kæmi út árið 2013 en útgáfudegi hefur verið frestað nokkrum sinnum síðan þá. Líkt og við greindum frá í fyrra þá er leikurinn væntanlegur á PlayStation 3 og PlayStation 4 leikjatölvurnar – enginn útgáfudagur er þó kominn fyrir PS útgáfuna.

Ný stikla var birt samhliða fréttatilkynningu sem má sjá hér fyrir neðan.

Ný stikla úr Aaru’s Awakening

Höfundur er Bjarki Þór Jónsson,
ritstjóri