Uppfært 14.11.2014 kl. 13:58
Norræni leikjadagurinn (Nordic Game Day) verður haldinn hátíðlegur á bókasöfnum á Norðurlöndum laugardaginn 15. nóvember. Borgarbókasafnið tekur í fyrsta sinn þátt og verður hægt að spila alls konar spil á aðalsafni, Kringlusafni, Gerðubergssafni og Sólheimasafni. Einnig geta gestir tekið þátt í ratleik og spilað á móti öðrum norrænum keppendum í tölvuleiknum Icycle.
Í fréttatilkynningu kemur fram að yfir 140 bókasöfn á Norðurlöndum taka þátt í Norræna leikjadeginum. „Með leikjadegi ársins í ár verður Norræni leikjadagurinn að hefð, og það gleður mig mjög. Þetta er norræn hefð sem Norræna leikjastofnunin styður með ánægju. Leikjadagurinn staðfestir að tölvuleikir eru menningarbær miðill“, segir Klaus Hansen, stjórnarformaður Norrænu leikjastofnunarinnar (The Nordic Game Institute).
Bókasöfnin halda úti dagskrá þar sem allir geta komið og tekið þátt í leikjum. Hvert safn smíðar sína eigin dagskrá en öll söfnin stefna að sama marki: vekja áhuga á leikjum sem menningarbærum miðlum á borð við bækur, tónlist og kvikmyndir. „Í leikjum má finna góðar sögur, stórbrotin ævintýri og fullt af fjöri og spennu. Þar verða til samfélög og vettvangur mannlegra samskipta“ segir Lone Munkeberg, verkefnisstjóri Norræna leikjadagsins árið 2014.
En það er ekki bara hægt að spila spil og leiki á bókasöfnunum. Sama dag verður hægt að prófa nýjustu útgáfuna af tölvuleiknum EVE: Valkyrie í Tölvulistanum milli kl. 11:00 og 16:00. Leikurinn hefur verið í þróun hjá íslenska leikjafyrirtækinu CCP frá árinu 2013 og er sérstakur fyrir þær sakir að hann notast við sýndargleraugu. Leikurinn er væntanlegur á Oculus Rift og Sony Morpheus.
Starfsmenn CCP verða á svæðinu og eiga allir sem mæta möguleika á vinningum frá Razer og Steelseries. Allir þeir sem prófa EVE: Valkyrie fá 60 daga kóða sem gildir fyrir EVE Online. Nánari upplýsingar fást hér á Facebook-síðu viðburðarins.
Við hvetjum lesendur að sjálfsögðu til að taka þátt og fagna þessum degi! Við minnum á listann okkar yfir 11 nýlega norræna leiki sem getur verið gaman að renna yfir í tengslum við Norræna leikjadaginn. Góða skemmtun og njótið dagsins!
Höfundur er Bjarki Þór Jónsson