SK Telecom sigrar ALL-STAR mótið
Kóreska liðið SK Telecom bar sigur úr býtum í úrslitaviðureigninni á League of Legends ALL STARS mótinu í dag. Í úrslitunum mætti SKT kínverska liðinu OMG, í fimm leikja seríu sem fór 3-0 SKT í vil. Þrátt fyrir að gefa OMG ekki einn leik eftir, voru allir þrír leikirnir hörkuspennandi og leit ansi oft út fyrir að OMG myndu snúa seríunni sér í hag. Þannig fór þó ekki, og hampa því SKT ALL STAR Invitational titlinum og ganga frá mótinu með 50.000$ verðlaunafé.
Einnig var keppt í ALL STAR Duel Challenge, en í úrslitunum þar megin vann Team ICE (Archie, Doublelift, Cool, MadLife og Froggen) 8-5 sigur á Team FIRE (Shy, QTV, Diamond, Bjergsen og WeiXiao). Eins og gefur að kynna í Duel leikjum, voru leikirnir allir fremur stuttir en spennandi engu að síður, þar sem leikkunnátta og hæfileikar hvers spilara sáust mjög vel.
Sena sýndi beint frá mótunum í Háskólabíó um helgina. Í dag, á úrslitadeginum, voru um 200 manns í Háskólabíó að fylgjast með viðureign SKT og OMG. Stemmningin í salnum var mjög góð og var augljóst að þarna voru gallharðir League of Legends aðdáendur samankomnir til að hvetja sitt lið áfram. Áhorfendur klöppuðu, hrópuðu og fögnuðu í hvert skipti sem liðunum laust saman, og þótti nokkuð ljóst að stuðningsmenn SKT voru þarna í nokkrum meirihluta. Sena á hrós skilið fyrir að standa að viðburði sem þessum, og vonandi munu fleiri slíkir viðburðir verða haldnir á næstunni.
Þessi glæsilegu auglýsingaplaköt fyrir viðburðinn prýddu alla veggi Háskólabíós.
Fyrsti leikur SKT og OMG að hefjast.
Salurinn var þéttsetinn.
Blaðamaður áætlar að um 200 manns hafi mætt til að fylgjast með á úrslitadeginum.
Áhorfendurnir fögnuðu ákaft í hvert skipti sem liðin tókust á.
Sena stóð fyrir sínu eigin 1v1 móti um helgina.
Áhorfendur flykktust á bak við hvern spilara til að fylgjast með.
Komið var fyrir Playstation 4 tölvum og fúsballborði fyrir áhorfendur að dunda sér við á milli leikja.
Höfundur er Kristinn Ólafur Smárason,
fastur penni á Nörd Norðursins.
Þú hefur kannski áhuga á þessu...
Leikjavarpið #28 – PlayStation Showcase 2021, Twelve Minutes og Daði Freyr →
Afmælisveisla á Twitch – Spilum leiki og gefum veglegar gjafir! →
Spilar retróleiki til styrktar Barnaspítala Hringsins →
