Leikjarýni: Pokémon X & Y

Enn einn Pokémon leikur og enn ein ferð sem spilarar þurfa að leggja í til að verða þeir bestu og ná að fanga öll vasaskrímslin. Núna fær leikjaserían að njóta sín í Nintendo 3DS vélinni og lítur leikurinn alveg ótrúlega vel út. Stóra spurningin er samt hvort þetta sé nóg fyrir seríu sem er búin að vera í gangi í 15 ár. Er leikurinn nógu góður fyrir einstaklinga sem eru að byrja að spila Pokémon í fyrsta sinn og fyrir þá sem hafa spilað frá upphafi?

Vissar tegundir leikja geta ekki gert miklar breytingar á þeirri formúlu sem fær leikinn til að virka. Þú skiptir ekki út fótboltanum í FIFA fyrir byssur af því að fyrstu persónu skotleikir eru svo rosalega vinsælir í dag. Ekki er hægt að stokka mikið upp í Pokémon nema koma með algjörlega nýjan leik, sem hefur reyndar oft verið gert og er þá hægt að nefna gimsteininn Pokémon Snap sem allir kannast við.

Byltingakenndur! Eina orðið sem kemur í kollinn eftir að hafa spilað leikinn. Ný vél sem þýðir flottari grafískur stíll, ferskleiki í stýringum og hellingur af nýjum vasaskrímslum til að berjast við og fanga. Þrátt fyrir allar nýjungar í útliti þá er þetta samt enn gamli góði Pokémon sem allir muna eftir. Ótrúlega gaman að sjá hvernig leikurinn nýtir þrívíddar tækni 3DS vélarinnar í bardögum, en aðeins í þeim sem leikurinn nýtir sér þennan eiginleikaa. Hugmyndaflugið sem fer í árásir vasaskrímslanna er skemmtilega útfært og vel hugsað. Engin breyting er á spilun leiksins frá fyrri leikjum, enda engin þörf á því. Helsta breytingin er þó að núna fær spilarinn tvisvar sinnum að velja sér vasaskrímsli. Í byrjun leiks stendur valið á milli Chespin, Fennekin og Froakie og seinna býðst spilaranum að velja á milli Bulbasaur, Charmander og Squirtle en eins og margir vita þá eru þetta upphafs vasaskrímslin í fyrstu leikjunum.

PokemonXY

Í leiknum er ein nýjung sem aldrei hefur verið notuð áður, en það er ofur þróun (e. Mega Evolution). Þegar vasaskrímsli hefur náð fullum þroska og heldur á sérstökum hlut þá getur spilarinn ofur þróað skrímslið á meðan bardaga stendur. Þetta er skemmtileg viðbót en minnir alveg ótrúlega mikið á Digimon.

Ein af viðbótum leiksins eru litlir aukaleikir, í þeim er hægt að klappa vasaskrímslunum og þjálfa þau aukalega. Þetta er engin rosaleg viðbót en passar samt vel í ramma leiksins. Þessir leikir eru hrikilega einfaldir í uppsetningu og lítið sem ekkert heillandi. Þetta er langt frá því að vera galli í leiknum en gerir ekki mikið fyrir hann.

Núna er hægt að berjast við aðra á netinu á mjög auðveldan hátt. Undra skipti er virkilega áhugaverð viðbót í leiknum. Það byggir á því að spilarinn velur vasaskrímsli sem hann vill láta frá sér í skiptum, en veit hins vegar aldrei hvernig skrímsli hann fær í staðinn.

Pokémon X og Y stendur svo sannarlega fyrir sínu og tekst virkilega vel að fanga upplifun fyrstu leikjanna í seríunni. Leikurinn lítur vel út, spilast ótrúlega vel og tekst að gera allt rétt fyrir gamlan aðdáenda Pokémon. Nokkuð öruggt að þessi penni muni spila þennan leik í langan tíma. Í raun má segja að Pokémon hafi loksins tekist að þróast yfir í eitthvað meira, líkt og vasaskrímsli gera í leiknum.