Þetta er fyrsta bók Christian Matari (höfundurinn er íslenskur en kýs að koma fram undir þessu nafni) og tekst honum nokkuð vel til. Bókin byrjar á góðum hraða og nær að grípa lesandann strax.
Sagan gerist í öðru sólkerfi rúmum 1.200 árum í framtíðinni. Menn hafa komið sér vel fyrir á hinum ýmsum lífvænlegum hnöttum þegar mjög fjandsamlegar geimverur gera árás á nýlendurnar og þar með hefst áratugalangt og blóðugt stríð á milli Terran-ara (mennirnir) og Nyari geimverana. Menn grípa svo til þess örþrifaráðs að klóna hermenn í stórum stíl til þess að reyna að vinna þetta vonlausa stríð. Aðalpersónan Marcus Grey, klónaður hermaður er ásamt herdeild sinni sendur í fyrstu sendiför þeirra sem á eftir að draga mikinn dilk á eftir sér. Það er ekki allt með felldu og Marcus uppgötvar að sendiförin sjálf var einungis yfirvarp. Og það líður ekki á löngu þar til að hann áttar sig á því að hann er ekki eins og aðrir.
Án þess að spilla söguþræðinum er óhætt að segja að sagan verður æ meira spennandi. Höfundur passar vel upp á það að gefa ekki of mikið upp og heldur því forvitni lesandans fram í næstu bók því nóg er af ósvöruðum spurningum. Stíllinn í bókinni er nokkuð þéttur, skiptist á hasar og hægari köflum, auðveldur í lestri og þokkalega vel uppbyggður.
Í heild sinni er bókin spennandi og hin besta skemmtun en hún skilur líka eftir sig vangaveltur um ýmis siðferðismál eins og til dæmis klónun þessarra hermanna og þeirra rétt til vals og vald stærri fyrirtækja sem gera allt til að ná fram sínum markmiðum. Það er sem sagt ekki bara hasar í gangi heldur líka allskonar samsæri, leyndardómar, græðgi, völd og já, líka ást.
Um helstu persónurnar má kannski segja að sumar séu ekki nógu djúpar eða of týpulegar og minna helst á tölvuleikjapersónur (enda vinnur höfundurinn hjá CCP) en væntanlega fá þær að þroskast meira þar sem að þetta er fyrsta bókin af níu og verður fróðlegt að fylgjast með framvindu sögunnar.
Þetta er velheppnuð vísindaskáldsaga og hlakka ég til næstu bókar.
Einnig vil ég benda á mjög fróðlega heimasíðu bókarinnar en þar er hægt að skyggnast betur í þennan heim. Á henni er að finna smásögur, myndir og ýmsar aðrar gagnlegar upplýsingar: Locusorigin.com.
– Vildís Bjarnadóttir