The Walking Dead skotleikur væntanlegur

Activision hefur kynnt nýjan leik sem er byggður á hrollvekju sjónvarpsþáttunum The Walking Dead. Nú þegar er til útgáfa af leik sem byggður er á myndasögublöðunum og er leikurinn í formi sögu þar sem að spilarinn er ekki við stjórnartaumana allan tímann, sá leikur ber sama nafn og er gerður af Telltale Games, en útgáfa Activision verður fyrstu persónu skotleikur.

Leikurinn verður framleiddur af Terminal Reality sem þekktir eru fyrir að framleiða leiki á borð við Ghostbusters: The Video Game og Monster Truck Madness. Leikurinn mun koma í verslanir á næsta ári fyrir Xbox 360, PlayStation 3 og PC.

Um leikinn

Leikurinn mun snúast í kringum bræðurna Daryl Dixon og Merle í leiðangri þeirra í áætlað öryggi í Atlanta. Spilarar munu stjórna Daryl þar sem markmiðið er að koma í veg fyrir það að uppvakningarnir uppgötvi þá og verður spilarinn að velja á milli þess að berjast eða forða sér frá þeim.

Daryl verður hvergi öruggur á leið sinni í gegnum sveitir Georgíu í þessum eyðilagða heimi – Activision

Birgðir verða af skornum skammti og þurfa spilarar því að fara sparlega með mat og skotfæri. Daryl mun hitta fleiri persónur á leiðinni og er það í höndum spilarans hvort þær muni fylgja honum, en þetta er ein af þeim stóru ákvörðunum sem spilarinn verður að taka í leiknum.

– Böðvar G. Jónsson

Deila efni

Tögg: Bodvar G Jonsson, The Walking Dead