Samsærið – Nýr ókeypis íslenskur þrautaleikur fyrir PC
Fyrir stuttu gaf íslenska leikjafyrirtækið Gamatic út tölvuleikinn Samsærið. Leikurinn er þrautaleikur sem var þróaður og hannaður af Gamatic, en leikurinn sjálfur er á íslensku. Í leiknum er spilarinn settur í spor persónunar Cian, sem flækist inn í dularfullt morðmál og tekur það upp á sína arma að komast til botns í málinu. Til þess þarf Cian að ferðast á milli staða í S-Evrópu og vera skrefi á undan rannsóknarlögreglunni sem hefur hana grunaða um morðið.
Til þess að komast áfram í leiknum þarf spilarinn að finna 10 eða fleiri umbeðna hluti sem eru faldir á stillimynd á skjánum. Þegar allir hlutirnir eru fundnir heldur saga leiksins áfram og ný stillimynd með földum hlutum tekur við. Blaðamaður Nörd Norðursins tók sér smá stund til að prufa Samsærið, en óhætt er að segja að þrátt fyrir einfalda uppsetningu leiksins reyndist ekki auðvelt að finna alla hluti sem beðið var um á hverjum skjá, enda voru þeir oft vandlega faldnir í bakgrunni stillimyndarinnar. Því er heppilegt að hægt er að smella á takka sem gefur vísbendingu um hvar næsta hlut er að finna ef viðkomandi er alveg fastur. Þó lenti blaðamaður Nörd Norðursins fljótlega í galla sem hefti spilun leiksins. Á milli stillimynda heldur saga leiksins áfram en á meðan þeim stendur þrengist sjónsvið spilarans. Þessi þrenging hélt sér út yfir í næsta borð leiksins sem gerði u.þ.b. 50% af stillimyndinni ósjáanlega, en þó var hægt að komast hjá þessum galla með því að endurræsa borðið.
Samsærið lítur einstaklega vel út fyrir leik af þessari gerð og er í grunninn fínasti þrautaleikur. Tónlistin í leiknum er drungaleg og spennandi, og setur spilarinn í vissar stellingar í leit sinni að vísbendingum. Leikurinn er eflaust miðaður að unendum þrautaleikja eða yngri aldurshópum, enda með eindæmum einfaldur í spilun og spilarinn er aldrei undir neinni pressu við að komast áfram.
Hægt er að nálgast Samsærið ókeypis með því að líka síðu Samsærisins á Facebook.
– KÓS
Þú hefur kannski áhuga á þessu...
Spilar retróleiki til styrktar Barnaspítala Hringsins →
Leikjarýni: Tiny Knight – „Í besta falli sæmilegur platformer“ →
Jökull „Kaldi“ Jóhannsson sigrar Intel Hearthstone Cup í Bretlandi →
