DREDGE er einspilunar ævintýra veiðileikur með óheillavænlegan sjóstraum. Þessi orðasamsetning virðist sérstök en úr kemur heillandi leikur sem er einstakur. Þú spilar sjómann sem lendir í að stranda veiðibátnum sínum á leið á nýjar slóðir. Þú rankar við þér í nálægum bæ, þeim sem þú ætlaðir að fara að vinna sem sjómaður. Bæjarstjórinn aðstoðar þig og lánar þér gamlan bát til að geta sinnt veiðimennskunni. Með því fyrsta sem bæjarstjórinn segir við þig er að fara út og fara að veiða í dagsbirtu, en að vera kominn aftur fyrir sólarsetur, áður en þokan kemur.
Þessi byrjunarsena stillir tóninn fyrir leikinn sem skemmtilegur veiðileikur þar sem spilari siglir bátnum sínum um, finnur fiskitorfu og beitir mismunandi veiðarfærum til að veiða sjávardýrin. En ábendingin frá bæjarstjóranum situr aftast í huganum og gefur til kynna að það er meira í gangi en bara að veiða sjávarfang og selja á næsta fiskimarkaði.
Til að veiða fiska og önnur sjávardýr þá þarf þartilgerð veiðifæri. Átta mismunandi svæði eru aðgengileg þar sem hægt er að beita veiðifærum.Til að byrja með hefur báturinn bara veiðifæri fyrir þau svæði sem eru nálægt byrjun leiksins, en eftir því sem spilari veiðir meira, og finnur ýmsa hluti, þá er hægt að fá aðgang að betri og öflugri veiðifærum. Þegar verið er að veiða þá eru smáleikir (mini-games) í gangi þar sem spilari þarft að tímasetja smelli á réttum tíma til að veiða fiska á sem stystum tíma.
Spilari hefur aðgang að korti til að átta sig á hvar báturinn er staddur en gott er að skoða kortið reglulega til að ná að heimsækja sem flestar eyjar. Því á mörgum eyjum er bryggja með einhverju til að kanna. Sumstaðar eru litlir veiðibæir þar sem er hægt að fá upplýsingar, orðróma, draugasögur og verkefni. Aðrar eyjur bera ummerki um skip og báta sem hafa strandað og oft er hægt að rannsaka flakið og mögulega finna vísbendingar eða birgðir. Gott er að tala við sem flesta og fá upplýsingar um umhverfið, því þótt að margir merkja inn á kortið hvað þeir eru að tala um þá eru ekki allir svo góðir.
Eftir því sem liður á leikinn fær spilari birgðir sem gerir honum kleift að uppfæra bátinn. Hvort sem það er að stækka birgðarými, bæta við öflugri vélum, eða smella inn betri veiðarfærum. Spilari fær aðgang að eiginleikum eins og að geta siglt hraðar, fjarflutt sig milli staða og fleira.
Tíminn er fljótur að líða í spilun leiks, hvort sem það er í raunheimum eða í leiknum sjálfum. Þegar sólin sest þá fer ekkert á milli mála að sjónsvið bátsins þrengist svo um munar. Það er hægt að kveikja á ljósi á bátnum til að sjá aðeins fram fyrir sig en það dugar skammt. En þegar siglt er á fullum hraða þá er oft hætta á að klessa bátnum á sker sem voru ekki endilega þarna þegar dagsbirtan var. Þannig bæði er sjónsviðið skert og ekki gott að sigla með fullum hraða. En eftir því sem báturinn er lengur við veiðar, og sérstaklega um nætur, án þess að hvíla sig þá byrjar sjómaðurinn að sjá ofsjónir. Eða eru þetta ofsjónir?
Dulúð í heimi DREDGE er mikil og sagan sem er á yfirborðinu er allt önnur en sagan sem liggur í djúpinu. Með spilun þá uppgötvar spilarinn allskonar dularfulla hluti sem eru í gangi, hjálpar mögulega eitthvað til, sprengir stíflur, flýr sjávarskrímsli. Ég verð að segja að þessi leikur kom stórskemmtilega á óvart og mæli ég mikið með honum. Þetta er frábær leikur til að grípa í og sjá fram á að klára á nokkrum spilakvöldum. Ég spilaði leikinn mest á Nintendo Switch, en leikurinn er fáanlegur á Steam, PlayStation 4, PlayStation 5, Xbox og GOG.
Það eru komnar tvær viðbætur fyrir leikinn sem heita The Pale Reach og The Iron Rig, og stækka þær leikinn með meiri dulúð, sjávardýrum og nýjum svæðum til að kanna. Leikurinn er framleiddur af Black Salt Games.