Miðvikudaginn 8. apríl kl. 10:15 býður Rannsóknasetur skapandi greina (RSSG) í samstarfi við CCP Games upp á samtal um skapandi ferli tölvuleikja. Kanónur úr íslenska leikjabransanum verða með erindi þar sem fjallað verður meðal annars um listræna nálgun á tölvuleikjum og um tengsl tölvuleikja við listir og menningu.
Nauðsynlegt er að skrá sig til að mæta í húsakynna CCP Games í Grósku, 3. hæð, að Bjargargötu 1, 102 Reykjavík. Erindum verður einnig streymt en ekki umræðum sem fram fara í kjölfarið meðal fundargesta. Athugið að erindin fara fram á ensku.
Á heimasíðu RSSG er að finna yfirlit yfir dagskrá og þau erindi sem flutt verða:
- Steingerður Lóa Gunnarsdóttir er sjálfstætt starfandi leikjahönnuður og stundakennari við Háskólann í Reykjavík. Í erindinu sínu mun Lóa m.a. ræða að hvaða leyti megi kalla tölvuleikjagerð list.
- Halldór Snær Kristjánsson, framkvæmdastjóri, listrænn stjórnandi og meðstofnandi Myrkur Games, leiðir þar þróun leikja og starfsemi fyrirtækisins. Halldór mun m.a. segja okkur frá því hvernig Myrkur hefur nýtt leiklistina og hæfileika leikara í tölvuleikjagerð.
- María Guðmundsdóttir, framkvæmdastjóri og stofnandi Parity Games, er með yfir 20 ára reynslu í tölvuleikjageiranum og mun m.a. segja okkur frá því samstarfi sem Parity hefur átt við söfn og hvað liggur að baki samstarfinu.
- Jonatan Van Hove er sjálfstætt starfandi leikjahönnuður sem hefur starfað í bransanum frá árinu 2010. Í erindi sínu mun Joon m.a. veita gestum innsýn í hvernig það er að vera sjálfstætt starfandi í þessum bransa.