Linux uppsetning fyrir klink á Linux InstallFest

Haldið verður Linux InstallFest á Múltíkúltí, Barónsstíg 3 í Reykjavík, kl. 15:00 – 21:00. Þar geta áhugasamir borgað 500 kr. fyrir uppsetningu á Linux Mint eða öðru Linux stýrikerfi á tölvuna sína. Gjaldið rennur til Pírata og Félags um stafrænt frelsi á Íslandi.

Stór hluti tölvunotenda notar ennþá Windows XP stýrikerfið en frá og með 8. apríl næstkomandi mun Windows hætta að uppfæra stýrikerfið. Windows XP mun þar af leiðandi verða auðveldara skotmark með tímanum fyrir tölvuþrjóta og um að gera að uppfæra yfir í nýrra stýrkerfi.

Linux er ókeypis stýrikerfi og byggir á opnum og frjálsum hugbúnaði. Linux Mint og Linux Ubuntu eru einstaklega notendavæn stýrikerfi sem bjóða upp á marga möguleika og haug af ókeypis, opnum og frjálsum hugbúnaði. Til gamans má geta að þá styður Steam leikjaþjónustan Linux stýrikerfin.

Þú getur með auðveldum hætti sett upp Linux Mint eða Linux Ubuntu sjálf/ur. Hér eru leiðbeiningar fyrir Linux Mint og hér eru leiðbeiningar fyrir Linux Ubuntu. Aftur á móti er tilvalið að kíkja á Linux InstallFest ef þú vilt láta aðra sjá um þetta litla vesen og í leiðinni styrkja Pírata eða Félag um stafrænt frelsi á Íslandi, en hver og einn ræður hvorn hópinn hann eða hún styrkir.

Linux InstallFest viðburðurinn er á Facebook og þar er fólki bent á að taka afrit af öllum gögnum:

Þegar stýrikerfið er uppfært í Linux, þá tapast öll gögn sem fyrir voru á tölvunni. Endilega afritið öll skjöl og ljósmyndir sem þið viljið varðveita af tölvunni og á flakkara eða minnislykil! Allur vari er góður.

.

Engar áhyggjur þó þið séuð ekki búin að afrita fyrirfram. Þá fáið þið í staðinn DVD-geisladisk sem þið getið bæði notað til að prófa stýrikerfið án þess að hrófla við tölvunni, og til að framkvæma uppsetninguna þegar afrit hafa verið tekin.

.

Linux Mint kemur í stað Windows á tölvunni. Stýrikerfið sér um að ræsa tölvuna, keyra upp forrit og uppfæra þau. Öryggisuppfærslur fyrir Linux Mint, og öll þau forrit sem með því fylgja, verða ókeypis um alla fyrirsjáanlega framtíð, í það minnsta fram til apríl 2017.

Í framhaldinu vil ég benda ykkur á Íslenska Linuxvefinn þar sem er að finna fjölda greina og þráða um Linux á íslensku. Einnig var Þórgnýr pírati með góða kynningu á Linux og InstallFestinu í útvarpsþættinum Harmageddon í morgun og er hægt að hlusta á viðtalið hér á Visir.is.