Spilin sem verða spiluð í fjórðu þáttaröð af Tabletop
Fjórða þáttaröðin af Tabletop er nú í tökum en Wil Wheaton þáttastjórnandi og erkinörd hefur tilkynnt hvaða spil verða spiluð í þáttaröðinni sem mun hefjast í júní/júlí. Þriðja þáttaröðin olli nokkrum einstaklingum vonbrigðum þar sem ítrekað kom það fyrir að leikreglunum í spilunum hafði ekki verið fylgt nægilega vel eftir sem glöggvir áhorfendur tóku eftir og létu óánægju sína í ljós.
Wheaton baðst afsökunar á þessum mistökum og hefur nú, til þess að koma í veg fyrir sömu mistök, fengið til liðs við sig einstaklinga frá útgefendum spilanna til að sjá til þess að farið verði eftir settum reglum.
Nýja þáttaröðin mun innihalda breitt svið af spilum sem henta öllum aldurshópum en þátturinn nýtur mikilla vinsælda meðal fjölskyldna og vildi Wil Wheaton því leggja sérstaka áherslu á fjölskylduvæn spil. Það er þó ekki þar með sagt að borðspilanördar verði skildir útundan því meðal þeirra titla sem má finna er Eldritch Horror, Fury of Dracula og Tiny Epic Galaxies svo dæmi séu tekin.
Hér má svo sjá heildarlista af spilum sem verða í þáttunum:
- Lanterns
- Fury of Dracula
- Mysterium
- Code Names (með sex leikmönnum)
- FATE Core RPG (Spunaspil)
- Dragon Farkle
- Flashpoint
- Harbour
- Eldritch Horror
- Star Realms
- Monarch
- Star Trek – 5 Year Mission
- Champions of Midgard
- Steam Park
- Tiny Epic Galaxies
- Welcome To The Dungeon
- Misspent Youth RPG (Spunaspil)
Uppröðunin hefur enn ekki verið ákveðin en þættirnir verða sýndir á tveggja vikna fresti á Youtube-rás Geek and Sundry. Ég mæli með að ef einhver er nú þegar að hugsa um að kaupa þessi spil sem eru á listanum að gera það von bráðar en þau spil sem hafa verið sýnd í þáttunum hafa oft orðið uppseld skömmu eftir sýningu hvers þáttar.
Þú hefur kannski áhuga á þessu...
Spilum Halo Infinite →
Spilum tölvuleiki á YouTube →
Ninja Theory birta áhrifaríkt myndband frá aðdáendum Hellblade →
