Draumar í myndasögusamkeppni og -sýningu Borgarbókasafnsins 2015
Borgarbókasafn Reykjavíkur og Myndlistaskólinn í Reykjavík í samstarfi við Nexus standa fyrir myndasögusamkeppni og -sýningu fyrir fólk á aldrinum 10-20+ ára.
Sýningin verður í aðalsafni Borgarbókasafns, Tryggvagötu 15. Hún verður opnuð sunnudaginn 3. maí, kl. 15.00 og stendur út maímánuð. Við opnun sýningarinnar verða úrslit samkeppninnar tilkynnt og verðlaun afhent við hátíðlega athöfn.
Þetta er í sjöunda sinn sem samkeppnin / sýningin er haldin og keppt er í tveimur aldurshópum: yngri og eldri.
Eins og tíðkast hefur er samkeppnin helguð tiltekinni myndasöguhetju og -þema. Að þessu sinni verður litið aftur til grárrar forneskju, en árið 2015 eru liðin hundrað og tíu ár síðan ein af fyrstu vinsælu persónum myndasagnanna leit dagsins ljós, litli drengurinn Nemo eftir Winsor McCay. Nemo litli ferðast um ævintýraheima á nóttunni, í draumum sínum og því er þemað að þessu sinni „Draumar“.
Dómnefnd skipa Signý Kolbeinsdóttir hönnuður, Sirrý (Margrét Lárusdóttir) myndasöguhöfundur og Björn Unnar Valsson bókmenntafræðingur.
Miðað er við að hámarkslengd efnis sé tvö A4 blöð eða ein síða í A3 (öðru megin) og eru þátttakendur beðnir um að nota frekar þykkan pappír en ekki venjuleg fjölritunarblöð til að tryggja að verkin verði fyrir sem minnstu hnjaski í upphengingu. Vinnuaðferðin er algerlega frjáls og verkin geta hvort sem er verið myndasaga eða stök mynd með myndasöguþema eða mynd sem tengist myndasögum á einhvern hátt.
Þátttakendur skili verkunum á Borgarbókasafnið, aðalsafn, Tryggvagötu 15, í umbúðum merktum: „Draumar 2015“. Síðasti skiladagur er 17. apríl 2015. Vinsamlega athugið að láta fylgja fullt nafn, fæðingarár, símanúmer og tölvupóstfang.
Nánari upplýsingar um samkeppnina / sýninguna verða settar á vef Borgarbókasafnsins þegar nær dregur, sjá borgarbokasafn.is.
– Fréttatilkynning frá Borgarbókasafni // Myndir: Little Nemo eftir Windsor McCay
Þú hefur kannski áhuga á þessu...
Norræna leikjavikan: Leikjadjamm og málþing um tölvuleiki á Borgarbókasafninu →
Tölvuleikir og spil á Nordic Game Day laugardaginn 19. nóvember →
Myndasögusýning í myndasögudeild: Lóa Hlín Hjálmtýsdóttir →
