The Lone Ranger í 80 ár
Lone Ranger á fastan stað í menningarsögu Bandaríkjanna. „Hi-Yo Silver, away!“ sem Jim Carrey hermdi eftirminnilega eftir í Ace Ventura 2, varð þekktur frasi. Silfurkúlurnar urðu einnig þekkt minni og upphafsstef óperunnar William Tell eftir Gioachino Rossini varð leiðarstef Lone Ranger.
Persónan kom fyrst fram árið 1933 og þá í útvarpsleikriti en það er ennþá á huldu hver skapaði persónuna upphaflega, þó svo að margir hafi verið nefndir. Líklega á þó rithöfundurinn Fran Striker heiðurinn en hann samdi handritið að útvarpsleikritunum og samdi einnig bækur um persónuna. Útvarpsleikritið varð vinsælt og í kjölfarið komu bækur, kvikmyndir, teiknimyndir og myndasögur. Lone Ranger barðist þó ekki einn gegn ranglæti því með honum í för var yfirleitt indjáninn Tonto. Það sem einkenndi Lone Ranger var sterk réttlætiskennd og boðskapur sögunnar var yfirleitt mjög skýr og beint til yngri kynslóðarinnar; allir menn eru skapaðir jafnir, hver og einn hefur tækifæri til þess að breyta heiminum og engan á að drepa o.s.frv.
Það er furðulegt að þessi vinsæla persóna, sem á svo fastan stað í hjörtum Bandaríkjamanna, hafi ekki verið kvikmynduð oftar en raun ber vitni. Aðeins þrjár kvikmyndir hafa verið gerðar, ef frá er talin einn langur sjónvarpsþáttur sem kom út 2003 og svo nú nýja myndin. Kannski er ástæðan sú að menn vildu gera hlutina rétt og bíða eftir stað og stund en einnig þekkir yngri kynslóðin þessa persónu ekki jafn vel og ofurhetjurnar sem birtast í kvikmyndahúsum í dag og gæti það verið stærsta ástæðan. Til gamans þá er áhugasömum bent á nýja myndasögu um Lone Ranger sem Dynamite útgáfufyrirtækið gefur út ef einhver vill kynnast Lone Ranger betur.
Bruckheimer og framleiðslufyrirtækið Disney ætla sér stóra hluti með The Lone Ranger en tökuferlið og undirbúningur myndarinnar var ekki dans á rósum, en tökur hófust 2011. Fjármagn til framleiðslunnar var af skornum skammti, svo ótrúlegt megi virðast, en Disney sætti sig ekki við upphaflegu kostnaðaráætlunina vegna þess að talið var að persónan væri ekki nógu þekkt og hefur því miklum fjármunum verið varið í markaðsherferð myndarinnar til að stimpla persónuna inn. Vonir eru bundnar við að The Lone Ranger standist sömu kröfur og gerðar eru til annarra ofurhetjumynda í dag. Stundin er nú runnin upp og The Lone Ranger er komin á hvíta tjaldið aftur eftir mikla bið.
1936 – 1956
Eftir vinsældir útvarpsþáttanna samdi Fran Striker nokkrar bækur um Lone Ranger og Tonto.
1949 – 1957
Fran Striker skrifaði einnig handritið að vinsælum sjónvarpsþáttaröðum um persónuna. Clayton Moore lék Lone Ranger og Jay Silverheels lék Tonto.
1956
Fyrsta kvikmyndin um persónuna er frumsýnd á hvíta tjaldinu og voru Moore og Silverheels fengnir til þess að leika í henni.
1958
Önnur myndin kemur út
1981
Kvikmyndin The Legend of the Lone Ranger kemur út en persónan hafði þá fengið langa pásu frá hvíta tjaldinu. Nú voru aðalhlutverkin í höndum Klinton Spilsbury sem Lone Ranger og Michael Horse sem Tonto. Myndinni gekk ekki vel í miðasölu og fékk lélega dóma.
2003
WB sjónvarpsstöðin reyndi að vekja persónuna aftur til lífsins og hugðist gera sjónvarpsþætti um persónuna. Prufuþátturinn gekk ekki vel og var hætt við frekari tilraunir til þess að blása lífi í kúrekann. Chad Michael Murray lék Lone Ranger og Nathaniel Arcand lék Tonto.
2013
Dynamite úgáfufyrirtækið gaf nýlega út myndasögu þar sem lýst er forsögu Lone Ranger og tilraunum hans til hefnda. Nánari upplýsingar um þær myndasögur sem Dynamite hefur gefið út um persónuna má finna hér.
3. júlí 2013
Stærsta útspil Disney og Jerry Bruckheimer í langan tíma er nýjasta kvikmyndin um Lone Ranger. Armie Hammer leikur Lone Ranger og Johnny Depp leikur Tonto. Leikstjóri myndarinnar er Gore Verbinski.
Höfundur er Ragnar Trausti Ragnarsson,
fastur penni á Nörd Norðursins.
Þú hefur kannski áhuga á þessu...
Kvikmyndarýni: Web junkie →
Veislan byrjar í dag! →
Vangaveltur um „found footage“ kvikmyndir →
