Eve Online Sinfóníutónleikar í Hörpu
Sinfóníuhljómsveit Íslands mun spila tölvuleikjatónlist úr EVE Online í Hörpu á Fanfest 2013. Íslenska leikjafyrirtækið CCP tilkynnti þetta í hádeginu í dag, en tilefni tónleikanna er 10 ára afmæli leiksins.
Sinfóníuhljómsveit Íslands er sífellt að fá fleiri stig frá okkur nördunum, en hljómsveitin hefur nú þegar haldið Lord of the Rings tónleika og Star Wars tónleika fyrir skemmstu. EVE Online tónleikarnir verða fyrstu alvöru tónleikar Sinfóníuhljómsveitarinnar sem tengjast tölvuleik með svo beinum hætti, en til gamans má geta að þá var skorað var á hljómsveitina fyrr á árinu til að halda tölvuleikjatónleika.
Miðasala er nú þegar hafin og er að kaupa miða hér, á heimasíðu Hörpu, og kostar hver miði á bilinu 2.900 – 3.900 kr. Tónleikarnir verða haldnir þann 24. apríl 2013 kl. 21:00.
Það er Jón Hallur Haraldsson, eða RealX, sem samdi tónlistina fyrir EVE Online og má nálgast gagnrýni á tónlistinni úr leiknum hér á Nörd Norðursins. Á heimasíðu Hörpu er sagt nánar frá tónlistarmanninum og tölvuleikjatónlistinni:
Jón Hallur Haraldsson (einnig þekktur sem RealX) hefur verið hjá CCP síðan árið 2000, og á árunum 2002 til 2009 skrifaði hann upprunalegu tónlistina fyrir EVE Online. Að öðrum eiginleikum leikjarins ólöstuðum hefur tónlistin í honum ávallt verið ein af sterkustu einkennum hans. Tónlist Jóns Halls hefur verið lýst sem sterkri skírskotun í sveimtónlist níunda áratugarins – einskonar blöndu af Jean-Michel Jarre og Vangelis. Þessi tónlist er nú orðin nokkurn veginn sígild fyrir þeim sem á hana hlýða, og mætti segja að hún verði sígildari en nokkru sinni fyrr nú þegar hún mun í fyrsta sinn vera flutt af sinfóníuhljómsveit. Leikmenn hvaðanæva að úr heiminum hafa lofað tónlistina og margoft beðið um meira, og það er aldrei að vita nema RealX lumi á einhverju nýju meistaraverki í náinni framtíð. Hann er enn virkur meðlimur í tónlistar- og hljóðdeild leikjarins og er þar að auki nýverið farinn að fást við hljóðforritun.
EVE sinfónían samanstendur af tíu frægum lögum úr EVE, s.s. „Stellar Shadows“ og „Surplus of Rare Artifacts“, og var það tónskáldið Kristján Guðjónsson sem setti þau upp fyrir sinfóníuhljómsveit. Í gegnum nákvæma nálgun á tónlistinni tekst Kristjáni að færa hvert lag í sinfóníubúning sem er nógu líkur upprunalegu útgáfunni til að kunnugir þekki það, en notast á sama tíma við þau tónundur sem aðeins sinfóníuhljómsveit getur framkvæmt.
Heimildir: EVE Community, EVE Fanfest 2013 og Harpa.is
Mynd: Harpa.is
– BÞJ
Þú hefur kannski áhuga á þessu...
Leikjavarpið #26 – Ratchet & Clank, Steam Deck og Activision Blizzard kæran →
Ring Fit áskorun í febrúar! →
Leikjavarpið #20 – Væntanlegir leikir 2021, Indiana Jones og Star Wars →
